येँ(नेपालभाषा टाइम्स)- म्याग्दीया सदरमुकाम बेनीइ नं लाखे प्याखं पिथंगु दु । बेनीइ नं वंगु गुंलाथ्व पंचमि (नागपंचमि) मंगलवाःकु लाखे प्याखं पिथंगु खः ।
येँय् मूलतः यँयाः कुन्हु मजिपाः लाखे पिथनेगु चलन दुसा येँय् नं पिने नेवाःतय् ख्वातुगु वस्ती दुगु थीथी जिल्लाय् धाःसा गुंलाया इलय् लाखे पिथनेगु याना वयाच्वंगु दु । बेनीइ गथांमुगःकुन्हु परापूर्वकालय् समाजयात अतिकं दुःख बिउम्ह भूतया प्रतीककथं कयातःम्ह गथांमुगःयात म्याग्दी खुसि व कालीगण्डकीया दोभानय् वायेधुंकाः लाखे प्याखं पिथनेगु याना वयाच्वंगु दु ।
बेनीइ करिब ३०० दँ न्ह्यवंनिसें नेवाः च्वना वयाच्वंगु धइगु इतिहास दुसा अन लाखे प्याखंया इतिहास नं उलि हे पुलां । बेनीइ २५० दँ न्ह्यःनिसें लाखे प्याखं पिथना वयाच्वंगु अनया स्थानीयतय्सं धाःगु दु ।
स्थानीय नेवाः न्ह्यलुवा सुविन श्रेष्ठं लाखे प्याखनय् गुंगू पुस्ता न्ह्यवंनिसें आःतक नं व हे छपाः ख्वाःपाः प्रयोग याना वयाच्वंगु खँ कनादीगु दु । ईकथं लाखे जुइम्ह मनू हिला वनाच्वंसां लाखेया निंतिं प्रयोग जुइगु ख्वाःपाः धाःसा लाखे प्याखंया इतिहास थें पुलां जूगु वय्कलं धयादीगु दु ।
बेनी नगरपालिका ७ वडाअध्यक्ष रमेश श्रेष्ठं देय्न्यंकं मेमेगु थाय्या ख्वाःपाः स्वयां बेनीया लाखे ख्वाःपाः बिस्कं जूगु नापं विशेष आकर्षण नं दुगु धयादीगु दु ।
LEAVE YOUR COMMENTS