येँ महानगर व निगू नगर दथुइ भगिनी सम्बन्ध
येँ – येँ महानगरपालिकाया प्रमुख विद्यासुन्दर शाक्यं अन्तर्राष्ट्रिय नगरलिसे थें हे देय् दुनेया नगर दथुइ नं असल अभ्यास सयेके फइगु जूगुलिं आन्तरिक नगर सम्बन्ध अप्वयेकागु खः धयादीगु दु ।
महानगर प्रमुख शाक्यं थुकथं आन्तरिक नगर सम्बन्धं स्थानीय उत्पादन व बजाः व्यवस्थापन, आपसी हितया निंतिं अध्ययन व अवलोकन, मूर्त अमूर्त सांस्कृतिक, सम्पदा व पर्यटन प्रवद्र्धन लिसें मानवीयताया नगर निर्माण याये फइगु नं धयादीगु दु ।
वय्कलं उगु खँ आः नकतिनि येँ महानगरपालिका व निगू नगर दथुइ भगिनी सम्बन्ध स्थापनाय निंतिं जूगु सम्झौता पती ल्हाःचिं तयेगु ज्याझ्वःया झ्वलय् धयादीगु खः । येँ महानगरपालिकां आः नकतिनि जक प्रदेश नं. १ या धनुकटा जिल्लाया पाख्रिवास नगर व सुदूरपश्चिम प्रदेशया डडेल्धुरा जिल्लाया अमरगढी नगरलिसे भगिनी सम्बन्ध कायम यायेत ग्वसाः ग्वःगु ज्याझ्वलय् नवासें महानगर प्रमुख शाक्यं उगु खँ धयादीगु खः ।
वंगु साउन २६ गते येँ भगिनी सम्बन्ध स्थापना सम्बन्धी सम्झौता पती येँ महानगर प्रमुख शाक्य व पाख्रिवास नगर प्रमुख वृषबहादुर राईं ल्हाःचिं तयादीगु खः । भगिनी सम्बन्ध सम्झौता पती ल्हाःचिं तयेधुंकाः निगुलिं नगरया प्रमुखं उकियात सार्वजनिक नं यानादीगु खः ।
पाख्रिवासलिसे जूगु सम्झौताकथं उगु क्षेत्रया सन्तले डाँडाया धार्मिक व पर्यटकीय क्षेत्रया विकासलिसें पार्क निर्माणया निंतिं येँ महानगरं १ गू करोड ५० गू लख दां अनुदानकथं उपलब्ध याकीगु जूगु दु ।
अथे हे येँ महानगर व अमरगढी नगर दथुइ जूगु सम्झौता पती महानगर प्रमुख शाक्य व अमरगढीया विश्वेश्वरप्रसाद ओझां ल्हाःचिं तयादीगु खःसा भगिनी सम्बन्धया घोषणापत्र निम्हं नगर प्रमुखं सार्वजनिक यानादीगु खः । थुगु नगरलिसे जूगु सम्झौताकथं अमरगढीया वडा नं. २ व ५या भौगोलिक क्षेत्रय् करिब ४५० रोपनी क्षेत्रफलय् अमरगढी पार्क निर्माणया निंतिं येँ महनगरं १ गू करोड ५० गू लख तका दां उपलब्ध याकीगु जूगु दु ।
अन्तर स्थानीय निकायलिसे भगिनी सम्बन्ध स्थापना यायेगु योजनाकथं थ्व स्वयां न्ह्यः येँ महानगरं कर्णाली प्रदेशया चन्दननाथ, बागमति प्रदेशया मेलम्ची व लुम्बिनी प्रदेशया रामग्राम नगरपालिकालिसे उकथं सम्बन्ध स्थापना यायेधुंकूगु दु ।
निगुलिं नगरलिसे भगिनी सम्बन्ध स्थापनाया निंतिं जूगु ल्हाःचिं तयेगु ज्याझ्वलय् येँ महानगर उपप्रमुख हरिप्रभा खड्गी श्रेष्ठ, प्रमुख प्रशासकीय अधिकृत राजेश्वर ज्ञवाली, सहरी योजना आयोगया उपाध्यक्ष सरोज बस्नेत, कार्यपालिकाया दुजःपिं अमरगढी नगरपालिकाया उपप्रमुख संगीता भण्डारी, प्रमुख प्रशासकीय अधिकृत लक्ष्मीप्रसाद उपाध्याय, धनकुटा नगरया उपप्रमुख देवकला पौडेल, प्रमुख प्रशासकीय अधिकृत डिकबहादुर राई लगायतया अधिकारीतय् उपस्थिति दुगु खः ।
LEAVE YOUR COMMENTS