मनपां झिंनिसःगू थासय् सिसि क्यामरा तइगु

येँ – येँ महानगरपालिकां सुरक्षायात थप बल्लाकेगु निंतिं झिंच्यासःगू थासय् सीसी क्यामरा जडान यायेगु तयारी याःगु दु ।थ्व स्वयां न्ह्यः नेपाल प्रहरीं कामपा दुने ३५० गू थासय् सीसी क्यामरा जडान यायेधुंकूगु दु । उगु क्यामरा मगाःगुलिं कामपां थप क्यामरा जडान यायेत्यंगु खः ।

आः जडान यायेगु क्यामरा नं नेपाल प्रहरी लिसे जानाः हे जडान यायेगु खँ कामपा सूचना प्रविधि महाशाखा प्रमुख ध्रुव काफ्लें कनादीगु दु ।
सीसी क्यामरा जडान यायेगु निंतिं कामपा व नेपाल प्रहरीया दथुइ कार्यदल दयेके धुंकूगु दु । आः जडान याइगु क्यामरा सम्पदा क्षेत्र, खुसि सिथय् व म्हो सुरक्षा दुगु सडक व गल्लीइ तयेगु तयारी कार्यदलं याःगु दु ।

उकथं हे फोहर संकलन यायेगु थासय् नं क्यामरा तयेगु तयारी जुयाच्वंगु दु । कामपाया कर्मचारीं इलय् फोहर मुं कि ममुं धइगु जानकारी कायेगु व इलय् ज्या मयाःपिंत कारबाही निंतिं उकथं क्यामरा तयेत्यंगु खः । सम्पदा क्षेत्रया संरक्षण व सुचुकुचु नियमित यायेगु निंतिं नं क्यामरां ग्वाहालि याइगु खँ धाःगु दु ।

कार्यदलं क्यामराया क्षमता कथं गुलि दुरीइ क्यामरा तयेगु धइगु निश्चित याइ । मोहनिं न्ह्यः हे क्यामरा जडान यायेगु धाःसां नं कामपा व प्रहरी दथुइ आन्तरिक सहलह ल्यं दनिगुलिं मोहनि लिपा जक क्यामरा जडान यायेगु ज्या तीव्र रुपं न्ह्याकेगु खँ धाःगु दु ।

सम्बन्धित बुखँ

LEAVE YOUR COMMENTS