सवालाख चैत्य दयेकीगु गुंला धलं

ख्वप(नेपालभाषा टाइम्स)- थनया साःक्वलान त्वालय् लख चैत्य धलं दनेगु शुरु दु । मानन्धर समुदायं सवा लाख चैत्य थानाः गुंलालछि यंकं न्यायेकीगु गुंला न्यकू धलं वंगु आइतवाःनिसें न्ह्याःगु खः ।

धलं दनेत वंगु शनिवाः चा काः वंगु खःसा आइतवाःनिसें धलं दनेगु ज्या न्ह्याःगु खः । आइतवाःकुन्हु धलं दनीपिं सकलें म्हःल्हुयाः नीसी यानाः विधिवत रुपं द्यः थायेगु थासय् दुहां वनाः न्यकू बाजं थानाः बहाः बही चाःहिलाः थथुसाः त्वालय् थ्यंकाः धलं दनेगु शुरु याःगु खः ।

गुंला लछियंकंया दुने छगू लख नीन्याद्वः चैत्य दयेके हे माःगु खर्चया ल्याखं नं व्यवस्थापन यायेत नं थ्व धलं दनेगु ज्या तसकं थाकूगु गुंला न्यकू धलं व्यवस्थापन समितिया नायः विष्णुबहादुर मानन्धरं ‘नेपालभाषा टाइम्स’यात कनादिल । वय्कलं कनादीकथं थुगुसी करिब ७४ म्हेसिनं थ्व धलं दनाच्वनादीगु दुसा धलं दनीपिंत माःगु सकतां व्यवस्थापन यायेत १० म्ह न्हिन्हिथं खटे जुयाच्वंगु दु ।

धलं दनीपिनिगु निंतिं मूकजि, द्यःभारि व न्याचिं यानाः झिम्ह व्यवस्था यानातःगु दु । न्हापा न्हापा जूसा कजि जूम्हं हे दक्वं खर्च व्यवस्थापन याना वयाच्वंगुलिइ आः वयाः समितिपाखें हे आर्थिक व्यवस्था याना वयाच्वनागु नं मानन्धरं कनादिल ।

धलं दनीपिं सकलें गुंपुन्हि लिपा सक्व, भ्वत, पन्ति, स्वयम्भू लगायत थीथी थासय् पुजा फः वनेमाःगु जूगुलिं वइगु गुंपुन्हितकया दुने छगू लख चैत्य थाये हे माःगु बाध्यता दुगु नं वय्कलं कनादिल । थ्व धलं दनीपिंसं न्हिं छछाः जक नयेमाःगु, नयेगु ज्वरे नं थम्हं यायेमाःगु, छेँजःपिं नापं च्वनेगु व द्यनेगु याये मजिउगु नियम दु ।
ख्वपय् थुकथं धलं दनेगु ज्या करिब न्हय्दँ लिपा जू वनाच्वंगु दु । थनिं न्हय्दँ न्ह्यः धलं दनेगु झ्वलय् दयेकूगु चैत्य दक्वं ख्वपया हे छगू चैत्यया गर्भय् तःगु खःसा थुगुसीया चैत्य नं उकथं हे गुगु छगू थासय् तयेगु ग्वसाः जुयाच्वंगु नं मानन्धरं कनादीगु दु । थौंकन्हय् खुसि तसकं फोहर जूगुलिं चीभाः चैत्यया गर्भय् तयेगु यानाच्वनागु वय्कलं कनादिल ।

येँ, यल, ख्वपलिसें भ्वँतय् नं थुकथंया धलं दनेगु परम्परत दया वयाच्वंगुलिइ आः वयाः ख्वपय् जक ल्यनाच्वंगु दु । थ्व धलं दनेत छक्वःया पालय् १५ गूनिसें १८ गू लाख तकं खर्च जुइगु वय्कलं कनादिल ।

सम्बन्धित बुखँ

LEAVE YOUR COMMENTS