खोप हयेगु निंतिं कुटनीतिक नोट
२० प्रतिशत जनसंख्याया निंतिं ६० अर्ब मालीगु
येँ (नेपालभाषा टाइम्स) – सरकारं कोरोना भाइरस (कोभिड १९) विरुद्ध या खोप नेपालय् हयेगु निंतिं थुगु खोपया विकास यानाच्वंगु थीथी देशय् कुटनीतिक नोट छ्वयेधुनागु खँ धाःगु दु । स्वास्थ्य तथा जनसंख्या मन्त्री भानुभक्त ढकालं खोपया स्वंगूगु चरणया परीक्षण यानाच्वंगु भारत, चीन, अमेरिका, बेलायत, जर्मनी, रुस व अष्ट्रेलियाय् कुटनीतिक नोट छ्वयेधुनागु खँ धयादीगु खः ।
कोभिड १९ विरुद्ध खोप हे मबिइकं थुकियात नियन्त्रणय् हयेत थाकुइगु निष्कर्ष पिकासें सरकारं याकनं खोप नेपालय् नं हयेगु निंतिं पहल सुरु यानागु खँ मन्त्री ढकालं धयादीगु दु । सरकारं आः खोप उत्पादन सुरु जुइवं जिटुजी (सरकार-सरकार दथुइया सहमति) व विश्व स्वास्थ्य संगठन थेंज्याःगु संघसंस्थाया ग्वाहालिं नेपालय् नं खोप दुत हयेगु तयारी यानाच्वंगु खः ।
थ्वहे दथुइ स्वास्थ्य मन्त्रालयया प्रवक्ता डा. जागेश्वर गौतमं नेपाःया कुल जनसंख्याया २० प्रतिशत खोप वइगु सुनिश्चित जुइधुंकूगु खँ धयादीगु दु । वय् कलं मेमेगु देशय् खोप छ्यलाबुला सुरु जुइवं नेपालय् नं खोप कायेखंकेगु निंतिं सरकारं ज्या सुरु यायेधुंकूगु खँ नं धयादीगु दु । प्रवक्ता गौतमं आःतकया स्थिति स्वयेबलय् वइगु मार्च महिना दुने नेपालय् खोप वयेफुगु खँ धयादिसें आःयात स्वंगूगु चरणया परीक्षण जुयाच्वंगु खोप मध्ये गुगु खोप वइ धयागु खँ धाःसा आः हे धाये फइमखुनिगु खँ नं धयादीगु दु ।
संसारय् थौंकन्हय् १४०गू खोपया विकास जुयाच्वंगु दुसा थुपिं मध्ये झिगू खोप जक स्वंगूगु चरणया परीक्षण वनेधुंकूगु दु । थुपिं मध्ये अमेरिकाया भाइजर, मोर्डना व बेलायतया अक्सफोर्ड युनिभर्सिटीं विकास याःगु खोप ९० प्रतिशत तक सफल जूगु खँ पिहां वयेधुंकूगु दु। थुपिं मध्ये भाइजर कम्पनीया खोप ला अमेरिकाय् वइगु झिंन्यान्हु दुने हे बीगु सुरु जुइत्यंगु दु । नेपालय् नं खोप हयेगु तयारी याःसां थुकिया निंतिं ध्यबा मुंकेगु व खोपयात भण्डारण यायेगु ज्याय् धाःसा सरकारयात तःधंगु हाथ्या वयाच्वंगु दु । आः २० प्रतिशत जनसंख्यायात गाक्क हयेगु खोपया निंतिं जक ६० अर्ब दां आवश्यक जुइगु खँ धाःगु दु। गाभी-कोभ्याक्स नांया संस्थां नेपाःया जनसंख्याया २० प्रतिशतयात गाक्क खोप २० प्रतिशत सहुलियतं बीगु बचं बीधुंकूगु दु, तर २० प्रतिशत सहुलियतं हःसां तकं तुरुन्त ६० अर्ब दांया आवश्यक जुइगु जुयाच्वंगु दु । थ्व ध्यबा गुकथं व्यवस्थापन यायेगु धयागु हे सरकारयात हाथ्या जुयाच्वंगु दु ।
मेखे भाइजर कम्पनीं विकास याःगु खोप माइनस ७० डिग्रीइ भण्डारण यायेमाः । थ्व खोप हयेगु खःसा थुकियात आवश्यक तापक्रम मिले यानातयेगु फ्रिज नेपालय् मदुगुलिं नं समस्या वयेफुगु खँ धाःगु दु । मेखे खोपया न्हापांगु खेप वयेधुंकाः सुयात न्हापां बीगु धयागु नं प्राथमिकता निर्धारण याये ल्यं दनि। सरकारं अग्रपंक्तिं च्वनाः ज्या यानाच्वंपिं स्वास्थ्यकमीं व ५५ दँय स्वयां च्वय्यापिंत प्राथमिकताय् तयाः खोप बीमाःगु सुझाव विज्ञतय्सं बियाच्वंगु दु ।
LEAVE YOUR COMMENTS