मन्त्री केशव स्थापित बर्खास्त

येँ – प्रदेश नं. ३या भौतिक पूर्वाधार मन्त्री जुयाच्वंम्ह केशव स्थापितयात मन्त्री पदं बर्खास्त याःगु दु । मुख्यमन्त्री डोरमणि पौडेल लिसे मन्त्रिपरिषद्या बैठकया इलय् हे ल्वापु याःगुलिं स्थापितयात बर्खास्त याःगु खँ धाःगु दु ।
मुख्यमन्त्रीया सचिवालयं संविधानया धारा १६९ कथं स्थापितयात बर्खास्त याःगु खँ धाःगु दु । वंगु बुधवाः जूगु मन्त्रिपरिषदया बैठकय् हे मुख्यमन्त्री पौडेल व मन्त्री स्थापित दथुइ चर्काचर्की जूगु खँ धाःगु दु । मन्त्री स्थापितं थःगु ज्या प्रभावकारीढंगं पूमवंकू धकाः खँ वयेवं निम्हेसिया दथुइ चर्काचर्की जूगु खँ धाःगु दु ।

मन्त्रिपरिषदय् हे चर्काचर्की जुइवं मुख्यमन्त्री पौडेलं स्थापितयात बर्खास्त यायेगु तयारी याःगु खः । थुकिया निंतिं वय्कः येँय वयाः पार्टीया नेतातलिसे सहलह याःगु खँ धाःगु दु । वय्कलं प्रधानमन्त्री व नेकपा अध्यक्ष केपी ओलीयात अस्पतालय् हे नापलानादीगु खः । वय्कलं थःम्हं स्थापितलिसे च्वनाः ज्या याये फइमखु धासें बर्खास्त यायेगु निंतिं स्वीकृति काःगु खँ धाःगु दु ।

मन्त्री स्थापितं धाःसा मुख्यमन्त्रीलिसे विवाद जूगु खँ स्वीकार यानादीधुंकूगु दु । तर वय्कलं थःम्हं बांलाक ज्या मयाः धकाः मुख्यमन्त्री धाःगु खँय् विरोध यानागु खँ धयादीगु दु । थःत बिउगु जिम्मेवारी पूवंकागु खःसां कार्यसम्पादन बांमलात धकाः खँ वःगुलिं सामान्य विवाद जक जूगु खँ वय्कलं धया वयाच्वनादीगु दु ।

स्थापितया बर्खास्त लिपा वय्कःया मन्त्रालयया जिम्मा आःयात मुख्यमन्त्री थःम्हं हे कयातःगु दु ।

सम्बन्धित बुखँ

LEAVE YOUR COMMENTS