प्रहरीया सेवा केन्द्र परियोजनाय् सहलह

येँ – प्रहरी प्रधान ज्याकू महिला तथा बालबालिका निर्देशनालयं मिसा व मस्तय् निंतिं सेवा केन्द्र स्थापन सम्बन्धी परियोजनायात कयाः सहलह याःगु दु । निर्देशनालयपाखें २० गू जिल्लाय् संचालन यानाच्वंगु महिला तथा बालबालिका सेवा केन्द्र स्थापन सम्बन्धी परियोजनायात सम्पन्न जूगु सम्बन्धय् उगु सहलह याःगु खः ।

ज्याझ्वलय् निर्देशनालय प्रमुख लिसें प्रहरी नायब महानिरीक्षक हरिभक्त प्रजापतिं परियोजनाया सफलता, प्रतिफल व उकिया शिक्षाया बारे सम्बन्धित सरोकारवालालिसें अनुभव कालबिल यायेगु उद्देश्यं उगु सहलह ज्याझ्वः यानागु जानकारी बियादिल ।

उगु इलय् वय्कलं परियोजनाबारे प्रस्तुतीकरण यासें परियोजनाया परिचय, उकिं कःघाना च्वंगु क्षेत्र, उद्देश्य, विषयवस्तु, कार्यान्वयन व्यवस्थापन, प्रगति विवरण व उपलब्धियात कयाः चर्चा यानादीगु खः । उगु परियोजना अन्तर्गत जनचेतना ज्याझ्वःया प्रभावकारिता, क्षमता अभिवृद्धि, समन्वय व सहकार्य लगायत वइगु दिनय् परियोजनायात अझ प्रभावकारी याना यंकेगु रणनीतिया बारे नं जानकारी बियादीगु खः ।

समुदाय प्रहरी साझेदारी ज्याझ्वलं मिसा व मस्त सम्बन्धी ज्याझ्वःयात नं नापनापं यंकाच्वनागु व वइगु दिनय् ल्यं दुगु ५७ गू जिल्लाय् नं थुगु परियोजनायात न्ह्यःने यंकेत निंतिं पहल यायेगु वय्कलं धयादिल । सहलहया इलय् पिदंगु थीथी जिज्ञासायात कयाः वय्कलं लिसः बियादीगु खः ।