नेपालय् थप २५म्हेसित कोरोना संक्रमण

येँ – नेपाःया थीथी जिल्लाय् थप २५म्हेसित कोरोना संक्रमण जूगु दु । स्वास्थ्य तथा जनसंख्या मन्त्रालयया प्रवक्ता डा. विकास देवकोटाया कथं बाँकेय् ६म्ह, धनकुटाय् ५म्ह, कपिलवस्तुइ १३म्ह व नवलपरासी पश्चिमय् १म्हेसित कोरोनाया संक्रमण जूगु खः ।

बाँकेया नरैनापुर-५य् १७, २०, २८, ३० व ४०दँया मिजंत व खजुरा-५य् २७दँया मिजंयात संक्रमण जूगु दु । अथेहे धनकुटाय् २८, २९, ३५ व ३७दँया मिजंत व २४दँया मिसाया नं संक्रमण जूगु दु ।

अथेहे कपिलवस्तुया विजयनगर क्वारेन्टाइनय् २२, ३५ व ४८दँया मिजंतय्त संक्रमण जूगु दुसा महाराजगंज गाँउपालिकाय् ३, ४ व ६दँया मिसा मस्त नापं १६, २५ व ३६दँया मिसातय्त संक्रमित जूगु दु । उगु हे गाँउपालिकाय् १२दँया मिजं मचा नापं २०, २४ व ३४दँया मिजंतय्त नं संक्रमण जूगु दु ।

नवलपरासी पश्चिमया बेलबानी क्वारेन्टाइनय् च्वनाच्वम्ह सुस्ता गाँउपालिकाया २६दँया मिजंयात नं संक्रमण जूगु दु ।

संक्रमितत ३ निसें ४८दँयापिं खः । उकी मध्ये १८म्ह मिजं व ७म्ह मिसात जूगु जानकारी नं मन्त्रालयया प्रवक्ता डा. देवकोटा बियादीगु दु । थौं तकया संक्रमण कथं नेपाःया ३८गू जिल्लाय् कोरोना संक्रमित खनेदुगु दु । नेपालय् आः तक ४२७म्ह कोरोना संक्रमित खनेदुगु खँ मन्त्रालयं धाःगु दु ।

सम्बन्धित बुखँ

LEAVE YOUR COMMENTS