न्यूयोर्कया नेवाः मुना ः विवाद जूसां सम्पन्न जुइगुपाखे

येँ (नेपालभाषा टाइम्स)-थ्वहे वइगु अगष्ट ५, ६ व ७ तारिख कुन्हु अमेरिकाया न्यूयोर्कय् जुइगु हलिं नेवाः दबू (डब्लुएनओ) तःमुँज्या निर्वाचन समितिया कजि डा. प्रज्वललाल प्रधानं राजीनामा बियादीगु दु । वय्कलं संस्था दुने थीथी कथंया विवाद पिहां वयाच्वंगु व उकियात समाधान मयासे न्ह्याः वनेत्यंगु धइगु खँ तसें समितिपाखें राजीनामा बियादीगु खः ।

थ्व स्वयां न्ह्यः केशरमान ताम्राकारं नं स्वास्थ्यया कारणं निर्वाचन समितिया कजि पदं राजीनामा बियादीगु खःसा ताम्राकार लिपा डा. प्रधानं उगु पद कःघानादीगु खः ।

थ्वहे झ्वलय् डब्लुएनओया नायः सिजन श्रेष्ठं आः निर्वाचन समितिया मेम्ह दुजः शशि महाजुं कजि जुयाः निर्वाचनया ल्यं दुगु ज्या न्ह्याकी धयादीगु दु । वय्कःया कथं आः निर्वाचन सम्बन्धी निता ज्या जक याये ल्यं दनि, थ्व ज्या समितिया मेपिं दुजःतय्सं जिम्मा कायेगु कथं ज्या न्ह्यायेधुंकूगु दु ।

तर डब्लुएनओया संरक्षक दयारत्न शाक्यं धाःसा निम्ह निम्ह कजिपिंसं राजीनामा बीधुंकूगु जुयाः थुकिया बारे गम्भीर रुपं सहलह जुइमाःगु व वर्तमान कार्यसमिति भंग यासें मेगु हे तदर्थ समिति गठन यानाः तःमुँज्या यायेमाःगु माग यानादीगु दु । वर्तमान कार्यसमितिं निक्वः तक ९० न्हुया म्याद थपे यानाः थःगु कार्यकाल ताःहाकः याःगु व इलय् हे तःमुँज्या याये मफुगु द्वपं नं वय्कलं बियादीगु दु ।

मेखे नायः सिजन श्रेष्ठं तःमुँज्या इलय् हे याये मफुगुया कारण कोरोना महामारी खः धासें मनू हे मुने मफइगु अवस्था जूगुलिं थःपिनि तःमुँज्या नं लिज्याः वंगु खँ कनादीगु दु । अथे हे वय्कलं सम्पूर्ण तयारी जुइधुंकूगु तःमुँज्या लिछ्यानाः तदर्थ समिति गठन यायेबलय् तःमुँज्या झन् हे लिज्याइगु सम्भावना दु धासें अगष्टया तःमुँज्या सम्पन्न यानाः थम्हं विदा कायेगु खँ कनादिल । वय्कलं धयादिल, ‘तःमुँज्या छुं भचा लिज्याःगु खः, आः जुइगु निश्चित जुइधुंकाः हानं लिछ्यायेगु पाय्छि जुइ मखु ।’

अथे हे डब्लुएनओया सचिवालयपाखें छगू प्रेस नोट जारी यासें डब्लुएनओ बारे पिहां वयाच्वंगु थीथी खँया लिसः बिउगु दु । डब्लुएनओ संस्था अमेरिकाया राज्यय् जक दर्ता यानाः फेडरेल सरकारय् दर्ता मयाः धकाः वयाच्वंगु द्वपंया खण्डन यासें सचिवालयं अमेरिकाया कानून कथं संस्था फेडरलय् नं दर्ता जुइधुंकूगु व थःपिंसं अन हे वार्षिक कर पुलाच्वनागु खँ धाःगु दु । छुं भचा विवाद दुसां अगष्टया तःमुँज्या सम्पन्न हे जुइगु व थःगु छुं खँ दुसा अन हे तयेत नं नायः श्रेष्ठं इनाप यानादीगु दु ।

 

सम्बन्धित बुखँ

LEAVE YOUR COMMENTS