कांग्रेस हानं गठबन्धनया पक्षय्

येँ (नेपालभाषा टाइम्स)- स्थानीय चुनावय् गठबन्धन याःगु कारणं थःपिं अप्वः सिटय् त्याःगु कारणं उत्साहित जूपिं कांग्रेस नेतातय्सं आः न्ह्यःने वयाच्वंगु आम चुनावय् नं गठबन्धन यायेगु निर्णय याःगु दु ।

कांग्रेसया म्हिगः क्वचाःगु केन्द्रीय कार्यसमितिया बैठकं न्यादँ तक स्थिर सरकार बीगु नितिं गठबन्धनयात निरन्तरता बीगु निर्णय याःगु खः ।
बैठकया निर्णयय् धयातःगु दु, ‘वगु वैशाख ३० गते क्वचाःगु स्थानीय निर्वाचनं न्हापांगु दल जूगु नेपाली कांग्रेसयात प्रतिनिधिसभा व प्रदेश सभाया निर्वाचनय् नं स्पष्ट बहुमतपाखे लक्षित याकुसें गठबन्धनयात निरन्तरता बीमाःगु खः ।’

उकथं हे गठबन्धन दलतय् दथुइ तालमेल यायेबलय् संविधानया कार्यान्वयन, आर्थिक सामाजिक रुपान्तरण व वैदेशिक सम्बन्ध लगायतया विषयय् न्यूनतम मंकाः धारणा दयेकाः न्यादँ तक स्थिर सरकार दयेकेगु निर्णय नं पार्टीं याःगु दु ।

न्हापा थें हे गठबन्धन दयेकाः चुनावय् वनेगु जूसां लक्ष्य धाःसा थःगु हे एकल बहुमत वइकथं दयेका वनेगु निर्णय नं कांग्रेसं याःगु दु । आः वइगु चुनावय् गठबन्धन दयेकाः ल्वाःसां सरकार धाःसा याकःचां दयेक फइ कथंया रणनीति दयेकेमाःगु बारे बैठकय् सहलह जूगु खः । थुकिया लागिं सिट बाँडफाँड जुइबलय् हे खँ मिले यायेमाःगु खँय् नं नेतातय्सं बः बिउगु खः ।

कांग्रेसया कोइराला पक्ष चुनावय् गठबन्धन याये मजिउ धइगु पक्षय् दुगु खःसां स्थानीय चुनावय् वःगु लिच्वतं धाःसा उमिगु नं म्हुतुप्वाः बन्द जूगु खँ धाःगु दु ।
बैठकय् छम्ह केन्द्रीय दुजलं आः कांग्रेसं हिन्दू राष्ट्रया नारा ज्वनेमाः धकाः बिचाः तःगु खःसां पार्टीया सुं हे दुजःतय्सं उकियात महत्व धाःसा मबिउगु खँ धाःगु दु ।

सम्बन्धित बुखँ

LEAVE YOUR COMMENTS