एसएमएसपाखें खुसिबाःया जानकारी

येँ – वा मवःसा वा पीत थाकुइगु, वा वःसा खुसिबाःया पीर जुइगु । खास यानाः तराई लागाय् वा वल कि हे खुसिबाः वइगु खः लाकि धकाः सकसितं चिउताः जुइधुंकी । थज्याःगु इलय् खुसिबाःपाखें बचे यायेगु लागिं खास यानाः खुसिया जःखः च्वनीपिं मनूतय्त मोबाइल फोन व एसएअएसपाखें जानकारी बीगु ज्या जुयाच्वंगु दु ।

थ्व ज्या खुसिबाःपाखें बचे जुइगु लागिं अतिकं उपयोगी जुयाच्वंगु खँ स्थानीय मनूतय्सं धाःगु दु । थगुने नं तराईया थीथी जिल्लाय् खुसिबाः बारे जानकारी बीगु लागिं मौसम पूर्वानुमान महाशाखां करोडौं एसएमएस छ्वयाः मनूतय्त सतर्क याःगु खः । थुकिया नापनापं महाशाखां आः सामाजिक सञ्जाल मार्फत नं खुसिबाः बारे जानकारी बीगु याना हःगु दु ।

फेसबुक व ट्विटरपाखें खुसिबाः बारे जानकारी यायेबलय् याकनं थ्यनीगु व छगू व्यहोरया सुचं सकस्यां प्राप्त याइगु खँ महाशाखाया जलवायुविद् विनोद पराजुलीं कनादीगु दु । सामाजिक सञ्जाल व एसएमएसपाखें खुसिबाः बारे जानकारी बीबलय् मनूत थःथःगु छेँ त्वःताः सुरक्षित थासय् बिसिउँ वनेत ताःलाइगु व थुकिं यानाः आपालं जनधनया क्षति जुइगुपाखें बचे जुइगु खँ धाःगु दु ।

च्वय्या गुगुं लागाय् खुसिबाः वल धाःसा उकिया जानकारी क्वय् च्वंपिं मनूतय्त बीवं उपिं सुरक्षित थासय् तक वनेत प्रशस्त ई दइगु खँ धाःगु दु । गबलें गबलें धाःसा मत सिनाः अज्याःगु सुचं काये मफइगु समस्या दुगु खँ नं धाःगु दु ।