
ख्वप(नेपालभाषा टाइम्स)÷थनया जगातीइ च्वंगु यातायात व्यवस्था ज्याकू सारे याइगु जुइवं व्यवसायीतय्सं उकिया विरोध याःगु दु । झण्डै न्यादँ तक जगातीइ संचालन जुयाच्वंगु यातायात व्यवस्था ज्याकू सवारी चालक अनुमतिपत्र थिमिस्थित राधे राधे माइक्रोबस पार्कय् तये यंकीगु जुइवं उकियात कयाः व्यवसायीत विरोधय् कुहां वःगु खः ।
सूर्यविनायक नगरपालिका ८ वडाया जगातीइ २०७३ माघ २ गतेनिसें संचालन जुयाच्वंगु यातायात व्यवस्था ज्याकू (प्रदेश सरकारया श्रम, रोजगार तथा यातायात मन्त्रालय) आः वयाः राधे राधे माइक्रोबस पार्क च्वंगु पुलांगु भवनय् तये यंकेत्यंगु खः । यातायात व्यवस्था ज्याकू थुकथं न्हूगु थासय् तये यंकीगु जुइवं उकियात कयाः स्थानीय व्यवसायी लिसें लेखापढी व्यवसायीत विरोधय् कुहां वःगु खः ।
विरोधय् कुहां वःपिं स्थानीय व लेखापढी व्यवसायी संघर्ष समितिं छगू पत्रकार सम्मेलन यासें आर्थिक चलखेलया कारणं न्हूम्ह ज्याकू प्रमुख वयेवं ज्याकू मेथाय् तये यंकेगु योजना न्ह्यःने हःगु खँ धाःगु दु । स्थानीय व्यवसायी नापं लेखापढी व्यवसायीं तःधंगु आर्थिक चलखेलया कारणं न्हापा तयातःगु थासं आः अनुपयुक्त थासय् ज्याकू सारे यायेत्यंगु दावी यासें उकिया विरोध याःगु खः ।
संघर्ष समितिया संयोजक लक्ष्मी कार्कीं सरकारी मापदण्ड दुने न्यादँ तक ज्याकू संचालन जुयाच्वंगु छेँ न्हूम्ह प्रमुखया रुपय् नेत्र भट्टराई वयेवं ज्याकू सारे यायेत्यंगु पत्रकार सम्मेलनय् जानकारी बियादीगु दु । आतक प्रमुख जुयाः वःपिं सकसिगुं निंतिं उपयुक्त जूगु छेँ न्हूम्ह प्रमुख भट्टराई वयेवं अनुपयुक्त जूगु धइगु आर्थिक चलखेल जूगु वय्कलं धयादीगु दु ।
LEAVE YOUR COMMENTS