धर्मकीर्तिइ रूसी व भारतीय विज्ञया प्रवचन

येँ – थनया सीघलय् च्वंगु धर्मकीर्ति विहारय् रूसी राजदूतावासया सचिव मय्जु इलुया एण्ड्रोसोभापाखें बुद्ध धर्म बारे प्रवचन ज्याझ्वः जुल । वंगु शुक्रवाः विहारया धम्महलय् छगू ज्याझ्वःया दथुइ मय्जु एण्ड्रोसोभां विश्व शान्तिया लागिं बुद्ध धर्मया भूमिका बारे प्रवचन बियादीगु खः । वय्कः नेपालय् च्वंगु रूसी सांस्कृतिक केन्द्रया निर्देशक नं खः ।

ज्याझ्वलय् न्ववासें वय्कलं बुद्ध नेपालय् जन्म जूगु खःसां वय्कःया शिक्षा थौं विश्वय् ब्वलना वनाच्वंगु तनाव म्हो यायेत ज्या वःगु बिचाः तयादिल ।धर्मकीर्ति विहारय् वकुन्हु हे सनिलय् भारतया न्हूदिल्लीस्थित बी एन कपूर अस्पतालया नांजाःम्ह क्यान्सर विशेषज्ञ डा. आर. रंगारावपाखें क्यान्सर ल्वय् सम्बन्धी प्रवचन ज्याझ्वः नं जुल ।

धर्मकीर्ति विहारया प्रमुख धम्मवती गुरुमांयात भारतय् क्यान्सर उपचार यानादीम्ह प्रमुख चिकित्सक डा. रंगाराव हे खः । थुगुसी थःगु नेपाः भ्रमणया झ्वलय् वय्कः गुरुमांयात नापलायेत विहारय् झाःगु खः ।

ज्याझ्वलय् न्ववासें वय्कलं गुरुमांया आत्मबल व सकारात्मक चिन्तनया कारणं वसपोलया उपचार अःपुगु बिचाः तयादिल । लिसें क्यान्सरपाखें बचे जुइत थःगु नये–त्वने बानीयात सुधार यानाः नियमित व्यायाम यायेमाःगु खँ नं वय्कलं कनादिल ।