कोरोना स्वंगूगु लहर पनेगु तयारी
येँ – सरकारं ७७ गुलिं जिल्लाया प्रमुख जिल्ला अधिकारीतय्त कोरोना संक्रमिततय् लागिं वासः यायेत आइसोलेसन सेन्टर, अस्पताल व मेडिकल कलेज सूचीकृत याना तयेगु लागिं निर्देशन बिउगु दु । गृह मन्त्रालयं म्हिगः छगू सुचं जारी यासें कोरोना संक्रमणया स्वंगूगु लहर वये फइगु सम्भावना दुगु जुयाः उकियात हे ध्यानय् तयाः आइसोलेसन सेन्टर, फुक्कं अस्पताल, मेडिकल कलेजय् माःगु व्यवस्थापन यायेत प्रमुख जिल्ला अधिकारीतय्त निर्देशन बिउगु खः ।
न्हापा व निगूगु लहरया इलय् सूचीकृत अस्पतालत आः वयाः स्थगित यानातःगुलिं आः वयेफुगु स्वंगूगु लहरया सम्भावनायात ध्यानय् तयाः हाकनं सूचीकृत यायेमाःगु खँ धासें मन्त्रालयं आवश्यकताया आधारय् आइसोलेसन सेन्टर, अस्पताल व मेडिकल कलेजत सूचीकृत यायेत निर्देशन बिउगु खः ।
सूचीकृत अस्पतालया धलः स्वास्थ्य तथा जनसंख्या मन्त्रालयया स्वास्थ्य आपतकालीन कार्य सञ्चालन केन्द्रय् छ्वयेमाःगु खँ धाःगु दु । उकथं हे सूचीकृत अस्पतालया संक्रमितपिनिगु तथ्यांक विवरण न्हिथं अनिवार्य रुपं अद्यावधिक यायेत नं निर्देशन बिउगु दु । मन्त्रालयं मासिक अद्यावधिक विवरण यकिन यानाः उकथं निःशुल्क उपचार जूपिं संक्रमिततय्गु विवरण सम्बन्धित अस्पतालयात सोधभर्ना बीगु प्रयोजनया नितिं मन्त्रालयय् छ्वया हयेत नं निर्देशन बिउगु दु ।
थौंकन्हय् न्हियान्हिथं अप्वया वनाच्वंगु संक्रमणया ल्याः स्वयेबलय् स्वंगूगु लहरया खतरा तीव्र जुयाच्वंगु खँ धाःगु दु । स्वंगूगु लहर वल धाःसा याये माःगु तयारीयात कयाः सरकारं ज्या शुरु यानाच्वंगु खँ धाःगु दु ।
संक्रमित व सीपिनि ल्याः न्हियान्ह्थिं अप्वः
म्हिगः जक देय्न्यंकं ३,९१५ म्हेसित कोरोना संक्रमित पुष्टि जूगु दु । म्हिगः ११ हजार ७०८ म्हेसिया पीसीआर परीक्षण याःगु खःसा उकी मध्ये २७६३ म्हेसिेक संक्रमण पुष्टि जूगु खः । अथे हे ६८७४ म्हेसिया एन्टिजेन परीक्षण यायेगु झ्वलय् ११५२ म्ह कोरोना भाइरस संक्रमित जूगु खँ स्वास्थ्य तथा जनसंख्या मन्त्रालयं धाःगु दु ।
अथे हे म्हिगः २११८ म्ह विरामीत संक्रमणं मुक्त जूगु दुसा कोरोना संक्रमणं २७ म्ह मनू सीगु दु । नेपालय् म्हिगः तक ७ लाख २८ हजार ५३२ म्ह कोरोना भाइरस संक्रमितया ल्याः थ्यंगु दु । उकथं हे सीपिनिगु ल्याः नं १० हजार २३९ थ्यंगु दुसा कोरोना संक्रमणं मुक्त जूपिनिगु ल्याः ६ लाख ७९ हजार ४९५ म्ह थ्यंगु दु ।
मन्त्रालयया कथं थौंकन्हय् देय्न्यंकं संक्रमितया ल्याः ३८ हजार ७९८ थ्यंगु दु । उकी मध्ये ३५ हजार ५१८ म्ह होम आइसोलेसनय् च्वनाच्वंगु दुसा ३२८० म्ह संस्थागत आइसोलेसनय् च्वनाच्वंगु दु । कोरोना संक्रमित जूपिं मध्ये ७३६ म्ह आईसीयु व १८६ म्हेसित भेन्टिलेटरय् तयाः वासः याकाच्वंगु दु ।
LEAVE YOUR COMMENTS