बुंगद्यःया जात्राया निंतिं रथ दयेकेगु शुरु

यल – बुंगद्यःया जात्राया निंतिं खः दयेकेगु शुरु जूगु दु । थनया जक मखसे देय्या हे दकलय् ताःहाकःगु जात्राकथं कयातःगु बुंगद्यःया जात्राया निंतिं रथ दयेकेगु ज्या शुरु जूगु खः । गुथि संस्थानया कथं रथ दयेकेत माःगु दक्वं ज्वलंत चूलाकेगु ज्या जुइ धुंकूगु दु । संस्थानया यल जिल्लाया प्रमुख शैलेन्द्र पौडेलं कनादीकथं रथ दयेकेत आवश्क दक्वं सिँ, बेत, पं आदि चूलाये धुंकूगुलिं आः रथ दयेकेगु ज्या नं शुरु जूगु दु ।

बुंगद्यःया खः दयेकेगु जिम्मेवारी काइगु वाराहीतय्सं थःपिनिगु ज्या शुरु याये धुंकूगु दुसा चैत महिना तकया दुने रथया ज्या क्वचायेकेगुकथं ज्या जुयाच्वंगु दु । थ्व हे वइगु बछलाथ्व पारुकुन्हु बुंगद्यःयात रथय् बिज्याकी । थनया पूच्वय् बुंगद्यःयात रथय् बिज्याकल कि बुंगद्यःया जात्रा शुरु जुइ । अथे खःसां बुगद्यःया खः सालेगु ज्या धाःसा तृतियाकुन्हु निसें जक जुइ । बुगद्यःया खः द्यः रथय् बिज्याके न्ह्यः हे क्वचायेकेकथं ज्या जुयाच्वंगु दु ।

थुगुसी रथ निर्माया निंतिं अप्वःथें न्हूगु सिँ हे छ्यःगु दु । रथया घःचाः बाहेकं घःमाः, थां, रथया निंतिं माःगु मेमेगु दक्वं थासय् न्हूगु हे सिँ छ्यलीगु जूगु दु । रथया निंतिं वंगु कात्तिकनिसें हे सिँ पालेगु अनुमति कायेगु निसें कयाः ढुवानी यायेगु ज्या तकं जूगु खःसां अझं सिँ हये ल्यं दनि । आवश्यककथंया दक्वं सिँ थ्यंकः वये धुंकूगुलिं रथ निर्माण नं शुरु जूगु खःसा आः नियमित रुपं यायेमाःगु ज्या नं न्ह्याइगु संस्थानं न्ह्यथंगु दु ।