ताम्राकार समाजया मंकाः बाःर्‍हाः

यल – ताम्रकार समाजपाखें नेवाः समाजय् मिसातय्त याइगु प्रमुख संस्कारमध्ये छगू बाःर्‍हाः तयेगु ज्या जूगु दु। समाजं दँय्दसं थें थुगुसी नं वंगु माघ १३ निसें १८ गते तक मिसा मस्तय्त मंकाः बाःर्‍हाः तःगु खः । मुक्कं नीन्हय्म्ह मिसा मस्तय्त छकू हे क्वथाय् बाःर्‍हाः व शारीरिक विकासया लिसें थीथी पक्षया बारे जानकारी बीगु ज्या जूगु समाजं न्ह्यथंगु दु ।

जावलाख्यःस्थित समाजया थःगु हे भवनय् उकथं मंकाः बाःर्‍हाः तयेगु ज्या जूगु खः । समाजया ग्वसालय् स्वक्वःखुसी थुकथं मंकाः बाःर्‍हाः तयेगु ज्या जूगु व शारीरिक विकासया क्रमय् नेवाः परम्पराकथं मिसा मस्तय् निंतिं अपरिहार्य थुगु विधियात समाजं मंकाःकथं सम्पन्न यायेगु याना वयाच्वनागु समाजया नायः रवीन्द्रराज ताम्रकारं कनादिल ।

समाजं न्ह्याबलें नं नेवाः परम्परा, संस्कृति, संस्कार, विधि व्यवहारलिसें सम्पदा संरक्षण व उकिया जगेर्ना यायेगु ज्या याना वयाच्वंगु वय्कलं धयादिल । नेवाः समाजय्मि सातय्त यायेमाःगु संस्कार बाःर्‍हाः तयेगु ज्याय् लिपांगु इलय् गाक्कं खर्च अप्वया वनाच्वंगु व थीथीकथंया समस्यात नं वयाच्वनीगु जूगुलिं हे थःपिंसं मंकाःकथं थ्व संस्कार यायेगु ज्या न्ह्याकागु नायः ताम्रकारं कनादिल ।

समाजया सामाजिक व्यवहार व्यवस्था उपसमितिं ग्वसाः ग्वःगु ज्याझ्वः यायेत उलि सहज मजूसां नं थज्याःगु ज्याझ्वः याये खंगुलिं थःपिंत सन्तुष्टि दुगुलिसें समाजया प्रतिष्ठा नं कायम जुइगु उपसमितिया संयोजक मनोज ताम्रकारं कनादिल ।

मंकाः बाःर्‍हाः तयेगु ज्याय् सहभागि मिसा मस्तय्त व्यक्तित्व विकास, उत्प्रेरणा, शारीरिक विकास, यौन शिक्षा, यौन दुव्र्यवहार, साइबर अपराध, स्वास्थ्य, कला, संस्कृति, योगा लगायतया थीथी पक्षयात कयाः स्रोत व्यक्तिपाखें जानकारी बीगु ज्या जूगु खः । लिसें सहभागि सकसितं न्हियानिहथं चित्रकला, हुलाप्याखंया प्रशिक्षण नं बीगु ज्या जूगु समाजं न्ह्यथंगु दु ।

सम्बन्धित बुखँ

LEAVE YOUR COMMENTS