पञ्जरांयात कयाः अन्तक्रिया ज्याझ्वः

ख्वप – नेवाः बौद्ध धर्मावलम्बितय् तःजिगु नखः पञ्जरांयात कयाः छगू अन्तक्रिया ज्याझ्वः जुल । थनया चन्द्रायण स्वीटसय् जूगु ज्याझ्वलय् बौद्ध विद्वान पुष्परत्न शाक्यं पञ्जरांया महत्वयात कयाः थःगु धारणा न्ह्यब्वयादीगु खः ।

पञ्जरांया महत्वयात कयाः थःगु नुगःखँ तयेगु झ्वलय् वय्कलं भोजन दान न्ह्यागु इलय् नं याये जिउगु तर, सम्यक दान व पञ्जरां थेंज्याःगु दान यायेगु थाय् व विशेष ई दइ धासें व उकियात हे ध्यानय् तयाः दान यायेगु याना वयाच्वंगु प्रसंग न्ह्यथनादिल ।

ज्याझ्वलय् शान्तरत्न शाक्यं बौद्ध धर्मय् दानया अतिकं महत्व दुगु खँ कुलादिसें दश पारमिता दुने दान पारमिता नं लाःगु जुयाः दानया तसकं तःधंगु महत्व दु धयादिल ।

बौद्ध विद्वान पद्मसुन्दर शाक्यं न्याम्ह दिपंकरया बारे ध्वाथुइकादिसें पञ्जरांया इलय् छन्हु न्ह्यः इनाचो त्वालं न्याम्ह दिपंकर व सर्वसाधारयात ब्वनेकथं मत बीत बहनि वनेगु चलन दुगु धयादिल ।

थुकथं हे मेम्ह बौद्ध विद्वान संघरत्न शाक्यं बौद्ध धर्मया च्यागू दान मध्ये दकलय् महादान पञ्जरां हे जूगु खँ न्ह्यथनादिसें बौद्ध संघं दानयात अझ तब्या यायेगु याना वयाच्वंगु जानकारी बियादिल ।

ज्याझ्वलय् सहभागि पत्रकारतय्सं न्यंगु थीथी न्ह्यःया लिसः बौद्ध विद्वानपिंसं बियादीगु खः ।