जग्गा बह्रः तयेगु फुकुवा

येँ (नेपालभाषा टाइम्स)- सर्वोच्च अदालतं वर्गीकरण मजूगु जग्गा बह्रः तये मदइगु सरकारया निर्णय तत्काल कार्यान्वयन मयायेत आदेश बिउगु दु । बिष्णुबहादुर सुनुवारया निवेदनय् सुनुवाइ यासें न्यायाधीश ईश्वरप्रसाद खतिवडाया इजलासं म्हिगः उगु आदेश बिउगु खः ।

मन्त्रिपरिषदं भूमि व्यवस्था, सहकारी तथा गरिबी निवारण मन्त्री शशी श्रेष्ठया प्रस्तावय् जग्गाया वर्गीकरण मजूतले बैंक व वित्तीय संस्थापाखें जग्गा बह्रः तयाः धितो बन्धन पारित मजुइगु निर्णय याःगु खः । खेतीयोग्य जग्गा व गैरकृषि क्षेत्रया जग्गा वर्गीकरण जुइधुंकाः जक धितो बन्धक तये दइ धकाः सरकारं निर्णय याःगु खः ।

उगु निर्णय कार्यान्वयन मयायेत सर्वोच्चं जारी याःगु आदेशय् धयातःगु दु, ‘आः तक जग्गाया वर्गीकरण जुइधुंकूगु खनेमदु, जग्गाया वर्गीकरण मजूतले अनिश्चितकाल तक जग्गा जमिन धितो बन्धकी तये मदइगु व्यवस्था यायेबलय् नागरिकया मौलिक हकलिसें सम्बन्धित गुलिखे खँय् अनुचित लिच्वः लाइगु जूगुलिं निवेदन कथं क्वःमजिउतले कार्यान्वयन मयाये, मयाके ।’

सरकारया उगु निर्णय विरुद्ध संसदय् नं सः थ्वयेकूगु खः । उच्च शिक्षा अध्ययनया नितिं विदेश वनीपिं विद्यार्थीतय्त जग्गा बह्रः तयेमदुगुलिं समस्या ब्वलंगु सांसदपिनि धापू दु ।

सम्बन्धित बुखँ

LEAVE YOUR COMMENTS