२ गतेया बन्द स्थगित, आः प्रदेश–प्रदेश बन्द
येँ – स्थानीय तहया निंतिं लोकसेवा आयोगं पिथंगु विज्ञापन समावेशी मजू धासें नेपाल आदिवासी जनजाति महासंघं म्हिगः थनया फिब्व ख्यलय् प्रदर्शन यात । वा वयाच्वंगु इलय् नं सलंसः मनूतय्सं उकी ब्वति काःगु खः ।धर्ना ज्याझ्वलय् न्ववासें आदिवासी जनजाति महासंघया अध्यक्ष जगत बरामं कन्हय् साउन २ गतेया नेपाल बन्द स्थगित जूगु तर थःपिनिगु आन्दोलन धाःसा जारी हे दनिगु खँ कनादिल ।
वय्कलं आन्दोलनया स्वरुप हिउगु खँ कँसें आः छु छु प्रदेशय् लोकसेवा आयोगं जाँच काइगु खः वकुन्हु उगु प्रदेश बन्द यायेगु कथं आन्दोलनया न्हूगु ज्याझ्वः पित बियागु खँ नं कनादिल । ज्याझ्वः कथं साउन ४ गते प्रदेश १ य् लोकसेवा आयोगं जाँच कायेत्यंगु दु उकिं वकुन्हु प्रदेश १ बन्द यायेगु घोषणा वय्कलं यानादिल ।
उगु न्हि १ नम्बर प्रदेश बन्द जुइगु घोषणा याःगु दु । थुकथं छसिकथं जाँच काइगु प्रदेशत बन्द याना वनेगु ज्याझ्वः दयेकूगु दु । धर्नाय् थीथी जातीय संस्थाया दुजःपिंसं संविधानया मू मर्म व समानुपातिक समावेशी सिद्धान्त अःखः विज्ञापन वःगु धासें उकिया विरोध यानादीगु खः ।
लोकसेवा आयोगं वंगु जेठ १५ गते स्थानीय तहया निंतिं थीथी सेवा व पुचः ब्वथलाः प्राविधिक व अप्राविधिक पदय् ९१६१ म्ह खुला प्रतिस्पर्धां पदपूर्ति यायेगु विज्ञापन याःगु खः । प्रदर्शनकारीतय्सं थ्व विज्ञापन रद्द यानाः समावेशी समानुपातिक सिद्धान्त कथं विज्ञापन पिथनेमाःगु, सामान्य प्रशासन मन्त्री लालबाबु पण्डितं राजीनामा बीमाःगु माग नं याःगु दु ।
ज्याझ्वलय् न्ववासें अपांग अधिकारकर्मि मित्रलाल शर्मां आन्दोलन ट्रेलर जक जूगु व आयोगं उत्पीडित समुदाय व अपांगता दुपिंत विस्थापित यायेगु आज्जु कथं असमावेशी विज्ञापन पिथंगु द्वपं बियादिल । अथे हे उपत्यका सतक विस्तार पीडित संघर्ष समितिया अध्यक्ष सुमन साय्मिं विज्ञापन तत्काल रद्द यानाः समावेशी व समानुपातिक सुनिश्चित यानाः विज्ञापन पिथनेमाःगु माग यानादिल ।
फिब्व ख्यलय् प्रदर्शन याये न्ह्यः लुँहिति, थापाथली व बानेश्वरं जुलुस वःगु खः । प्रदर्शनय् आदिवासी, जनजाति, दलित, मिसा, मुस्लिम, मधेशी अपांगता दुपिं अल्पसंख्यक पुचलं ब्वति काःगु खः । प्रदर्शनकारीतय्सं लोकसेवाया विज्ञापन भिंकाः समावेशी विज्ञापन पिमथन व आयोगं जबर्जस्ती परीक्षा सञ्चालन यात धाःसा परीक्षा केन्द्रय् हे प्रदर्शन यायेगु लिसें प्रश्नपत्र खुइगु ख्याच्वः नं बिउगु दु ।
LEAVE YOUR COMMENTS