ने. सं. ११४६ चाैलाथ्व चतुर्दशी -

न्हूदँया लसताय् पीपीजीयुकेया भर्चुअल भिंतुना कालबिल ज्याझ्वः

येँ (नेपालभाषा टाइम्स) – पासा पुचः गुथि युके (पीपीजीयुके)या ग्वसालय् नेपाल संवत् ११४१ न्हूदँया लसताय् भिंतुना कालबिल ज्याझ्वः जुल । विश्वन्यंकं महामारी न्यना वनाच्वंगु कोरोना भाइरसया संक्रमण व बेलायतय् तयातःगु लकडाउनया दथुइ नं न्हूदँया भिंतुना कालबिल ज्याझ्वः जूगु खः । भर्चुअल माध्यमं ‘अनलाइन नेपाल संवत्-११४१’ या नां बियाः स्थानीय ईकथं न्हिनसिया २ ताः इलंनिसें ५ ताःई स्वघौतक उगु ज्याझ्वः न्ह्याःगु खः । पीपीजीयुके लन्दनया न्वकु संदीप श्रेष्ठं लसकुस यासेंन्ह्याःगु भिंतुना कालबिल ज्याझ्वलय् बेलायतया निंतिं नेपाःया राजदूत डा. दुर्गाबहादुर सुवेदी मूपाहांकथं झायादीगु खः ।

संस्थाया नायः मय्जु रुक्मणी मानन्धरं वर्तमान कार्यसमितिया प्रतिवद्धताकथं बाध्यतात्मक परिस्थितिइ च्वनाः ज्याझ्वः यायेमाःगु खँ कनादिसें गुथिपाखें दँय्दसं पिथना वयाच्वंगु ‘गुथि’ दँपौया अनलाइन संस्करणया नं पितब्वज्या यानादीगु खः । गुथिपाखें पिथंगु २० गूगु संस्करणया पिथना युके, महामारीया इलय् अग्रपंक्तिइ च्वनाः ज्या याःपिंप्रति समर्पित यानातःगु दु ।

संस्थाया बोर्ड ट्रस्टीजतय्पाखें ओजेश सिंहं नं भिंतुना देछानादीगु ज्याझ्वलय् ज्यासना पुचःया दुजः मय्जु अमिता श्रेष्ठं म्हपुजा गुकथं यायेगु धइगु बारे कनादीगु खः । भिंतुना कालबिल ज्याझ्वलय् संस्थापक दुजःपिं बालमुकन्द जोशी, उत्तम अमात्य, शशिधर मानन्धर, अमृतरत्न स्थापित, अर्जुन प्रधानलिसें संस्थाया कचा पीपीजीयूके रिडिबया मय्जु जानकी कायस्थ, एल्डर्सटया प्रतिमा जोशी, साउथ इष्ट लन्दनया सुशील प्रजापति, स्कटल्याण्डया विजय डंगोल, एनएनएयूकेया विकास सिम्खडां नं भिंतुना देछानादीगु खः ।

न्हापां सत्रलिपा निगूगु सत्रय् झिदँ क्वय् यापिं आरुश सिं, ओनिक सिंह व सरीन श्रेष्ठं थःपिनिगु ‘कुतः’ ब्यान्डया म्हसीका बिसें सांगीतिक प्रस्तुति बियादीगु खः। आस्था जोशी, सायलि डंगोल, बिभिया श्रेष्ठ, सुभाशिष श्रेष्ठ, मैया महर्जनं नं प्रस्तुति बियादीगु ज्याझ्वलय् सुशील प्रजापति, सत्यप्रसाद प्रजापति, अशोक अवाल, आयुषा श्रेष्ठ, आशिष श्रेष्ठ, मिन्टु श्रेष्ठ व सांस्कृतिक सचिव रश्मिता सिंह दर्लामीया पुचलं भैलः प्याखं न्ह्यब्वयादीगु ।

अथे हे ज्याझ्वलय् मदन थापा, जेसिका श्रेष्ठ, राफी श्रेष्ठ, राज मानन्धर, प्रमोद शर्मा, समिपा श्रेष्ठ व न्वकु संदीप श्रेष्ठया पुचलं परम्परागत संगीत न्ह्यब्वयादीगु खः । चय्म्ह स्वयां अप्वःसिया सहभागिता दुगु ज्याझ्वलय् सरिता महर्जन व पलिस्था महर्जनं नं भिंतुना सन्देश बियादीगु खःसा नेपाल संवत् या प्रवर्तक राष्ट्रिय विभूति शंखधर साख्वाःया कलाकृति नं न्ह्यब्वःगु खः । ज्याझ्वलय् संस्थाया मूछ्याञ्जे प्रणिशा शाक्यं सुभाय् देछानादीगु खः ।