आः नेवाःतय् एकीकृत आन्दोलन

येँ – विकासया नामय् स्वनिगःया आदिवासी नेवाःतय्त विस्थापित याना छ्वयेगु राज्यया नीति विरुद्ध आः व्यवस्थित रुपं आन्दोलन न्ह्याकेगु लागिं त्वाःत्वालं हे संगठन दयेका यंकेगु निर्णय जूगु दु । उपत्यकाव्यापी सडक विस्तार पीडित संघर्ष समितिया संयोजनय् शनिवाः च्वंगु फुक्क पक्षया मंकाः बैठकं थ्व निर्णय याःगु खः । बैठकय् ख्वना, बुंग, थानकोट आदि लगायतया स्थानीय जनताया उपस्थिति दुगु खः ।

राज्यपाखें आः नेवाःतय्गु भाषा, संस्कृति जक मखु बसोबास व निजी सम्पत्तिइ तकं प्रहार यानाः नेवाः व नेवाः सभ्यतायात हे विस्थापित यायेगु षडयन्त्रपूर्ण ग्वसाः याना हःगुलिं उकिया विरोधय् थ्व आः आन्दोन यायेगु खँ नं बैठकं धाःगु दु ।

राज्यया थीथी ज्यापाखें पीडित जूपिंसं आः छगू मंकाः नारा व मंकाः एजेण्डा दयेकाः न्ह्याः वनेगु नं निर्णय जूगु दु । समितिपाखें आः याकनं हे सतक संघर्षया ज्याझ्वः पित बीगु खँ नं धाःगु दु । थ्व झ्वलय् नेवाःतय्गु हे मुद्दा ज्वनाः आः वइगु चैत्र २५ गते आदिवासी जनजाति महासंघं याये त्यंगु प्रदर्शनय् थःपिंसं नं सक्रिय रुपं ब्वति कायेगु धकाः निर्णय याःगु दु ।