करिब १८ खर्बया बजेट

येँ – अर्थमन्त्री जनार्दन शर्मां म्हिगः १७ खर्ब ९३ अर्ब ८३ करोड तकाया बजेट पेश याःगु दु । थ्व बजेट चूलाकेगु लागिं सरकारं राजस्वपाखें १२ खर्ब ४० अर्ब ११ करोड तका दां उठे यायेगु लक्ष्य तःगु दु । म्हिगः हःगु बजेटय् सरकारं शिक्षा क्षेत्रया नितिं ७० अर्ब ५ करोड तका बजेट फ्याःगु दु ।

शिक्षा क्षेत्रय् प्रदेशय् ५ अर्ब ३२ करोड तका व स्थानीय तहपाखे १ अर्ब २१ अर्ब १ करोड फ्याःगु दु । सरकारं डँडेलधुराय् मेडिकल कलेज स्थापना यायेगु नं घोषणा याःगु दु । मेडिकल शिक्षाय् विदेशी विद्यार्थीयात समेत आकर्षण यायेत मेडिकल कलेजयात प्रोत्साहन यायेगु खँ नं बजेटय् न्ह्यथनातःगु दु ।

अथे हे कर्मचारी व शिक्षकया तलब नं १५ प्रतिशतं अप्वयेकेगु घोषणा याःगु दु । आः वइगु साउन १ गतेनिसें तलब बढे जुयाः वइगु खँ धाःगु दु ।

अथे हे बजेटय् वृद्धा भत्ता कायेदइगु उमेर हद नं म्हो याःगु दु । वइगु आर्थिक दँनिसें वृद्धभत्ता कायेगु उमेर निदँ क्वपालाः ६८ दँ याःगु दु । थौंकन्हय् ७० दँय् वृद्धभत्ता कायेदइगु व्यवस्था खः। भत्ता कायेमयःपिं लाभग्राहीयात सरकारं सम्मान यायेगु खँ नं धाःगु दु ।

अथे हे जलस्यँ ल्वचं कयाच्वं–पिनिगु निःशुल्क जलस्यँ प्रत्यारोषणया व्यवस्था याःगु दु । उकथं हे प्रादेशिक अस्पतालय् डायलासिस सेवा बीत डायलासिस मेसिन न्यायेगु निंतिं २० करोड तका विनियोजना याःगु दु । विपन्न जलस्यँ ल्वगिं निःशुल्क जलस्यँ प्रत्यारोपण यायेगु नितिं १० करोड विनियोजन याःगु दु ।

उकथं हे आयात नं २० प्रतिशत म्हो यायेगु आज्जु काःगु दु । अर्थमन्त्री शर्मां वा, कनि, छ्व व फलफूलया आयात ३० प्रतिशतं म्हो यायेगु व समग्र आयात २० प्रतिशतं क्वपालेगु घोषणा नं यानादीगु दु ।

अथे हे किसान पेन्सन योजना नं घोषणा याःगु दु । अर्थमन्त्रीं शर्मा बजेट भाषण यासें किसान पेन्सन योजनाया नितिं पुसा कथं १ अर्ब विनियोजन यानागु जानकारी बिउगु दु ।

अथे हे देय्या रुग्ण उद्योगयात हःपाः बीगु लागिं सार्वजनिक पदय् च्वनाच्वंपिं मनूतय्सं नेपाःया हे हेटौंडा कपडा उद्योगपाखें उत्पादन जुइगु कापः जक छ्यलेमाःगु नीति नं दयेकूगु दु । लिसें सरकारं बन्द जुइधुंकूगु जनकपुर चुरोट कारखाना, गोरखकाली रबर उद्योग नं हानं चले यायेगु खँ धाःगु दु ।

सम्बन्धित बुखँ

LEAVE YOUR COMMENTS