स्थलमार्ग जुयाः वंपिं नेपाःमिपिंसं भारतया विमानस्थलं ब्वये मदइगु

येँ- आवंलि स्थलमार्ग जुयाः भारत वंपिं नेपाःमिपिंसं भारतया विमानस्थलं मेगु देशया निंतिं ब्वया वने मदइगु जूगु दु । नेपाःया इनाप कथं भारतया अध्यागमन विभागं थ्व व्यवस्था लागू याःगु खः । थ्व व्यवस्था कथं यदि भारतया विमानस्थलं मेगु देशय् वनेगु खःसां नेपालं नं हवाइमार्ग जुयाः हे भारतय् थ्यंकः वनेमाः ।

थुकिया निंतिं नेपालं भारतया न्हूदिल्ली तक वनेबलय् नं नेपाःया पासपोर्टय् अध्यागमनया प्रस्थान स्ट्याम्प तयेमाः । हवाइ मार्ग वःगु जूसां पासपोर्टय् प्रस्थान स्ट्याम्प तयाः मवल धाःसा भारतं ब्वयेमदइगु खँ धाःगु दु । तर वैदेशिक रोजगार विभागया श्रम स्वीकृतिया स्टिकर तयाहःगु पासपोर्ट व नेपाःया राजदूतावासं बिउगु नो अब्जेक्सन सर्टिफिकेट क्यनाः धाःसा हवाई मार्ग छ्यलेदइगु खँ धाःगु दु ।

मध्यपूर्वी देय् साउदी अरब, कतार, कुवेत, युएई लिसें गुगुं देशय् नेपाःमि वनेत भारतीय विमानस्थल छ्यले मदइकथं नेपाः सरकारं प्रतिबन्ध तयातःगु दु । मानवतस्करी याइपिंसं भारतीय विमानस्थल छ्यलेगु यानाच्वंगुलिं थ्व व्यवस्था याःगु खः । थुपिं गुंगू देय् बाहेक मेगु देशय् वनेबलय् नेपालं हे हवाइ मार्ग जुया वनाः भारतय् दुहां वःगु अराइभल स्टाय्म्प तयेधुंकाः जक भारतीय विमानस्थल छ्यलाः मेगु देशय् वनेदइ ।

नेपाःया अध्यागमन विभागं स्थलमार्ग जुयाः भारत वनीपिं नेपालीतय् पासपोर्टय् प्रस्थान छाप तयामबीत थः मातहतया निकाययात निर्देशन बीधुंकूगु दु । भारतय् च्वंगु नेपाली दूतावासं नं छगू सुचं जारी यासें भारतया विमानस्थल छ्यलाः मेगु देशय् वनेमाःपिंसं नेपाःया विमानस्थलं जक भारत वयेत इनाप याःगु दु ।

सुचनय् धयातःगु दु, ‘नेपालं स्थलमार्ग जुयाः भारत दुहां वयाः तेस्रो मुलुकय् उडान यायेत स्वयेबलय् वयेफुगु समस्या पाखें बचे जुयत नेपाली नागरिकतय्त येँया त्रिभुवन अन्तर्राष्ट्रिय विमानस्थलं हे उडान यायेत विशेष इनाप याना ।’ थुकिं यानाः धाःसा नेपालं स्थलमार्ग जुयाः भारत दुहां वंपिं हवाइ मार्ग जुयाः नेपाः नं लिहां वयेमफइगु जूगु दु । भारतीय अध्यागमनं भारत दुहां वःगु छाप तयामतःपिं नेपाःमितय्त लिहां वनेत प्रस्थान छाप नं मबीगु जूगुलिं हवाइ मार्ग जुयाः लिहां वयेमफइगु जूगु खः ।

सम्बन्धित बुखँ

LEAVE YOUR COMMENTS