कोरोनाया न्हूगु ताजिया भाइरस खनेदयेवं बेलायतयात युरोपय् प्रतिबन्ध

एजेन्सी – बेलायतय् कोरोनाया छगू न्हूगु ताजिया भाइरस खनेदयेवं तःगू देशं बेलायत भ्रमण व बेलायतं वइगु उडानय् प्रतिबन्ध तःगु दु। थ्व न्हूगु भाइरस झन याकं संक्रमण जुइगु कथंयागु जूगु व नियन्त्रणं पिहां वनाच्वंगु विवरण सार्वजनिक जुइवं बेलायत भ्रमणय् धमाधम प्रतिबन्ध तयाहःगु खः ।

आयरल्यान्ड, जर्मनी, फ्रान्स, इटली, नेदरल्यान्ड व बेल्जियमं बेलायतं वइगु फुक्क कथंया उडान दिकाबीधुंकूगु दु। मेखे फ्रान्सं युरो टनेलपाखें जुइगु रेल सेवा दिकूगु दु। विश्व स्वास्थ्य संगठन (डब्ल्यूएचओं) कोरोनाया थ्व न्हूगु ताजिया भाइरसयात कयाः बेलायतया अधिकारीतलिसे खँ जुयाच्वंगु खँ धाःगु दु। थ्व भाइरस न्हापा स्वयां झन तीव्रगतिं न्यना वनाच्वंगु खँ धाःगु दु । तर थ्व तसकं घातक धाःसा मजूगु तायेकाःगु दु ।

बेलायत बाहेक थ्व न्हूगु ताजिया भाइरसया म्यूटेशन अर्थात उत्परिर्वत नेदरल्यान्ड, डेनमार्क व अस्ट्रेलियाय् नं खनेदुगु खँ डब्ल्यूएचओं धाःगु दु। थ्व न्हूगु भाइरसं आः विकास याःगु कारोना भाइरसया खोपय् फरक प्रतिक्रिया क्यंगु नं छुं प्रमाण मलूनिगु खँ धाःगु दु । थ्व भाइरस पनेगु निंतिं बेलायतया लन्दनस्थित दक्षिण पूर्वी भागय् कडा प्रतिबन्ध तःगु दु ।

थ्व हे डिसेम्बरया सुरु पाखे छुं नमूना परीक्षण यानास्वःबलय् बेलायतय् थें हे ज्याःगु न्हूगु भाइरस खनेदयेवं डच सरकारं प्रतिबन्ध तःगु खः । थ्व भाइरस नियन्त्रण यायेगु निंतिं सम्भव दुगु फुक्क कथंया कुतः यायेमाःगु खँ डच सरकारं धाःगु दु । बेलायतं वइपिं मनूपाखें न्यना वनेफुगु थ्व भाइरस नियन्त्रण यायेगु निंतिं युरोपेली संघया दुजः देय्त जानाः आवश्यक उपाय नालीगु खँ नं डच सरकारं धाःगु दु । थ्व भाइरस विरुद्ध रणनीति दयेकेत सोमवाः युरोपेलीसंघया राजदूततय् आपतकालीन बैठक जूगु दु ।

बेलायती प्रधानमन्त्री बोरिस जोनसनं न्हूगु ताजिया भाइरस पुलांगु भाइरस स्वयां ७० प्रतिशत अप्वः सरे जुइगु कथंयागु जूगु खँ धाःगु दु। बेलायतया प्रमुख मेडिकल अफिसर प्राध्यापक क्रीस ह्विटीं थुकिया विकास क्रमं स्थिति झन खराब यायेफुगु धाःगु दु ।