दकलय् तपाःगु मतपत्र येँ महानगरया

येँ- निर्वाचन आयोगं खुगुलिं महानगरया मतपत्र सार्वजनिक याःगु दु । आयोगं सार्वजनिक याःगु मतपत्रय् दकलय् तपाःगु येँ महानगरया मतपत्र खः ।

स्थानीय तह निर्वाचनय् दकलय् अप्वः चुनाव चिं दुगु मतपत्र नं येँ महानगरपालिकाया खः । येँ महानगरया मतपत्र देय्न्यंकंया दक्वं स्थानीय तहया मतपत्रमध्ये दकलय् तपाःगु मतपत्र खः । येँ महानगरय् उम्मेदवार जुइपिं आपालं दुगुलिं चुनाव चिंया ल्याखय् मतपत्र नं दकलय् तपाःगु जूगु आयोगं न्ह्यथंगु दु ।

येँ महानगरया मतपत्रय् ६४ ताजिया चुनाव चिं दुथ्यानाच्वंगु दु । राजनीतिक दल व स्वतन्त्रया निगू हे बिस्कं लहरय् चुनाव चिं तयाः मतपत्र तयार यानातःगु दु । येँ महानगरया प्रमुख, उपप्रमुख, ३२ वडाय् वडाअध्यक्ष, मिसा सदस्य, दलित मिसा सदस्य व खुल्ला सदस्यय् १६२ पदया निंतिं चुनाव जुइ । उकीमध्ये निगू वडाय् दलित मिसा सदस्यय् उम्मेदवारी हे दर्ता जूगु मदुसा प्यंगू वडाय् दलित मिसा सदस्य निर्विरोध जुइधुंकूगु दु ।

राष्ट्रिय मान्यता प्राप्त राजनीतिक दल, राष्ट्रिय मान्यता प्राप्त मजूगु राजनीतिक दल व स्वतन्त्रपाखें ८२६ म्ह प्रत्याशी चुनावी मैदानय् कुहां वयाच्वंगु दु । येँ महानगरय् स्वतन्त्र उम्मेदवारी बिउपिं आपालं दुगु व इमिगु चुनावं चिं नं बिस्कं बिस्कं जूगुलिं मतपत्र नं तपाः जूगु खः ।
उखे दकलय् म्हो उम्मेदवारी यल महानगरपालिकाय् लानाच्वंगु दु । यल महानगरया मतपत्र छगू जक लहरया दु । दकलय् म्हो उम्मेदवारी लानाच्वगु यल महानगरय् १९ गू चुनाव चिं दु ।

सम्बन्धित बुखँ

LEAVE YOUR COMMENTS