पहिचानवादीयात वार्ताय् सःतल
येँ (नेपालभाषा टाइम्स)- प्रदेश नम्बर १ या सरकारं प्रदेश नां ‘कोशी’ तःगु खँय् विरोध याना वयाच्वंपिं पहिचान पक्षधर आन्दोलनकारीतलिसे वार्ता याइगु जूगु दु । उकिया निंतिं स्वम्ह दुजः दुगु वार्ता पुचः नं नीस्वंगु दु ।
मंगलवाः माओवादीं सरकार त्वःतेवं अल्पमतय् लाःम्ह मुख्यमन्त्री हिक्मत कार्कीं पहिचान पक्षधरलिसे वार्ता यायेत समिति नीस्वंगु खः ।
खानेपानी, सिंचाइ तथा ऊर्जा मन्त्री तिलकुमार मेन्याङ्बोया नेतृत्वय् दयेकूगु वार्ता समितिइ सामाजिक विकास मन्त्री बुद्धिकुमार राजभण्डारी व सरकारया प्रवक्ता लिसें कृषि मन्त्री भक्तिप्रसाद सिटौला दुजः कथं च्वनादीगु दु ।
वंगु फागुन १७ गते प्रदेशसभा बैठकं प्रदेश १ या नां ‘कोशी’ तयेगु प्रस्ताव पारित यायेवं उकिया विरोधय् पहिचान पक्षधरत आन्दोलनय् कुहां वःगु खः । उकी लानाः वंगु चैत १० गते पद्म लिम्बु लाजेहाङ मदुगु खः । वंगु जेठ १४ गते संसदया प्रदेशसभा सदस्यतय्सं पहिचान पक्षधरतलिसे तत्काल वार्ता या धकाः सरकारयात दबाब बिउगु खःसा जेठ १५ गते गणतन्त्र दिवसया ज्याझ्वलय् मुख्यमन्त्रीं वार्ताय् वयेत इनाप याःगु खः ।
पहिचानया आन्दोलनयात सम्बोधन मयाः धासें जेठ १७ गते जसपां सरकार त्वःतूगु खःसा मंगलवाः माओवादी केन्द्रं नं सरकार त्वःतेवं कार्कीया सरकार अल्पमतय् लाःगु खः । कार्कीं प्रदेशसभाया बैठक अनिश्चितकालया नितिं स्थगित याकाः पहिचान पक्षधर लिसे वार्ता यायेत समिति नीस्वंगु खः ।
मुख्यमन्त्री कार्कीं वार्ता यायेत समिति नीस्वंसां पहिचान पक्षधर आन्दोलनकारीतय्सं धाःसा वर्तमान सरकारलिसे वार्ताया तत्काल सम्भावना धाःसा मदुगु खँ धाःगु दु । सरकार हे अल्पमतय् लायेधुंकूगु कारणं वार्ताया औचित्य मदुगु खँ जनजाति आन्दोलनया न्ह्यलुवा आङकाजी शेर्पां धयादीगु दु । वय्कलं ‘नेपालभाषा टाइम्स’ लिसे खँ ल्हासें धयादिल, ‘थ्व नाटक जक खः, क्वःदलेत्यंगु सरकारलिसे वार्ताया औचित्य मदु ।’
LEAVE YOUR COMMENTS