घोषणापत्रय् मानवअधिकार दुथ्याकी

येँ (नेपालभाषा टाइम्स)- राष्ट्रिय मानव अधिकार आयोगं राजनीतिक दलया घोषणापत्रय् मानव अधिकारया विषय दुथ्याकेत इनाप याःगु दु । आयोगं म्हिगः विज्ञप्ति जारी यासें वइगु निर्वाचनया नितिं घोषणापत्र दयेकेगु तयारी यानाच्वंगु राजनीतिक पार्टीयात घोषणापत्रय् मानव अधिकारया विषस दुथ्याकेत इनाप याःगु खः ।

आयोगं फुक्कं राजनीतिक पार्टीयात थःगु प्रतिज्ञापत्रय् मानव अधिकारया सम्मान, संरक्षण व सम्वद्र्धनया नितिं प्रतिबद्धता प्वंकेत इनाप याःगु खः । आयोगया प्रवक्ता टीकाराम पोखरेलं जारी याःगु विज्ञप्तिइ धयातःगु दु, ‘दलत पाखें जारी जुइगु निर्वाचन घोषणापत्र÷प्रतिबद्धतापत्रय् मावन अधिकारया सम्मान, संरक्षण व संवद्र्धनया नितिं नेपाःया संविधान, राजनीतिक दल सम्बन्धी ऐन, आयोगया सिफारिस लिसे नेपाःया अन्तर्राष्ट्रिय प्रतिबद्धता कथं उच्च महत्व व प्राथमिकता लिसें मानव अधिकारया विषययात दुथ्याकेत फुक्कं राजनीतिक दलतय्त हाकनं इनाप यानाच्वना ।

आयोगं लोकतान्त्रिक शासन प्रणाली, नागरिक स्वतन्त्रता, मौलिक अधिकार, मानव अधिकार, बालिग मताधिकार व आवधिक निर्वाचनया माध्यमं जक समृद्ध राष्ट्र दयेकेगु नेपाःया संविधानया आज्जु दुगु लुमंकुसें उकिया नितिं राजनीतिक दलतय्गु मू भूमिका जुइगुपाखे ध्यानाकर्षण नं याःगु दु ।

आयोगं प्रतिनिधिसभा व प्रदेशसभा दुजः निर्वाचनय् भयरहित, निष्पष व स्वतन्त्र रुपय् क्वचायेकेत इनाप यासें उकिया सम्बन्धय् आयोगं याःगु सिफासिया कार्यान्वयनया नितिं सचेत नं याकुसें विज्ञप्तिइ धयातःगु दु, ‘वंगु इलय् राजनीतिक दलतय्सं तयार याःगु घोषणापत्रयात आयोगं सतिक स्वयाच्वनागु दु, दलतय्सं वंगु इलय् थःगु घोषणापत्रय् मानव अधिकारया विषययात दुथ्याकाः मानव अधिकार प्रतिया थःगु प्रतिबद्धता कार्यान्वयन याःगुलिं च्वछासें वइगु घोषणापत्रय् अझ स्पष्ट जुइक मानव अधिकारया विषय दुथ्याकी धयागु आयोगं विश्वास कयागु दु ।’