सुलाच्वंपिं २२ म्ह भारतीय व पाकिस्तानी लुइकल

येँ (रासस) – भारतं वयाः सुनसरीयानिगू मस्जिदय् आश्रय कयाच्वंपिं २२ म्ह विदेशीतय्त लुइकूगु दु । सुनसरीया हरिनगर गाउँपालिका १य् च्वंगु जामिया मस्जिद मरकजय् छवाः न्ह्यव निसें इनरुवा, जल्पापुर जुयाः भुटाहा थ्यंपिं भारत मुम्बईया १४ म्हेसित सुनसरीया प्रहरीं लुइकूगु खः ।
प्रहरीं उमिके कोरोना संक्रमणया छुं नं लक्षण खनेमदुनिगु खँ धाःगु दु । अथेखःसां उमित अन हे मदरसाय् क्वारेन्टाइनय् तयेगु व्यवस्था याःगु दुसा उमिगु स्वाब परीक्षणया निंतिं बिपी कोइराला स्वास्थय विज्ञान प्रतिष्ठानय् यंकूगु दु ।

अथेहे सुनसरीया हे इटहरी उपनगरपालिका १८य् लाःगु वतपुर मस्जिदय् च्वनाच्वंपिं च्याम्ह पाकिस्तानीतय्त नं स्थानीयतय् गोप्य सुचंया आधारय् प्रहरीं लुइकूगु दु । थुमिगु स्वाब नं परीक्षणया निंतिं बिपी कोइराला स्वास्थ्य विज्ञान प्रतिष्ठान धरानय् छ्वःगु दु ।

स्थानीयवासीतय्सं विदेशं वःपिं स्वदेशी व विदेशीतय् बारे निगरानी तयाः वःगु सुचं प्रहरीयात बिइगु यानाच्वंगु दु ।

छुं ई न्ह्यव भारतया न्हूदिल्लीइ च्वंगु निजामुद्दीनय् जूगु तबलिगी जमातया धार्मिक सभाय् वनाः लिहां वःपिं थन सुलाः सुलाः दुहां वःगु व चान्हय् छगू थासं मेथाय् वनेगु यानाच्वंगुलिं उपिं च्वनाच्वंगु थाय् अझं पूवंक लुइकेमफुनिगु खँ धासें स्थानीयतय्सं थन कोरोनाया खतरा झन अप्वयाच्वंगु खँ धाःगु दु ।

सम्बन्धित बुखँ

LEAVE YOUR COMMENTS