ने. सं. ११४४ कौलाथ्व एकादशी - चालं

चुनाव प्रचार कन्हय् तक जक

येँ – वैशाख ३० गते जुइगु स्थानीय चुनावया मतदान न्ह्यःने थ्यंकः वयेधुंकूसां उम्मेदवारत धाःसा अझ नं जनताया छेँय् छेँय् थ्यंकेगु अवस्था मदयाच्वंगु खँ धाःगु दु । ई म्होचा जक दुुगुलिं घरदैलो ज्याझ्वः तकं पूवंक याये फइगु अवस्था मदुगु खँ चुनाव प्रचारय् लगे जुयाच्वंपिं कार्यकर्तातय्सं धाःगु दु ।

येँ मनपाया लागा आः न्हापा स्वयां तःधं जुइधुंकूगु दु । न्हापा बुँ जक दुगु क्षेत्र आः वस्तीया रुपय् विकास जुइधुंकूगुलिं उम्मेदवारत अन नं चाःहिउ वने मालाच्वंगु दु । थुकिं यानाः छगू लागा चाःहिलेत हे बान्हि बीगु जुयाच्वंगु दु । वडा अध्यक्ष व सदस्यया उम्मेदवारत थःगु वडाय् जक चाःहिउसां गाः तर मेयर उपमेयरया उम्मेदवारत धाःसा फुक्क वडाय् चाःहिले माःगुलिं त्यान्हुया फत्रक्क गले जुइगु खँ चुनाव अभियानकर्तातय्सं धाःगु दु ।

एमालेया मेयर पदया उम्मेदवार केशव स्थापितयात अझ नं थीथी वडाय् चाःहिउ वये माल धकाः कार्यकर्तातय्सं सःतः वयाच्वंगु दु, तर वय्कः वने धाःसा मलायेधुंकूगु खँ धाःगु दु । अथे हे कांग्रेस उम्मेदवार सिर्जना सिंह नं फुक्क वडाया फुक्कं क्षेत्रय् थ्यंके फइगु अवस्था मदयेधुंकूगु खँ धाःगु दु ।

अथे खःसां तःधंगु पार्टीया मेयर उपमेयर उम्मेदवारत थः थ्यंके मफुसां वय्कःपिनि पार्टीया वडा कमिटीया कार्यकर्ता जूसां वनाः चुनाव प्रचार यानाच्वंगु दु । यक्व कार्यकर्ता मदुपिं स्वतन्त्र उम्मेदवारतय्त धाःसा फुक्क वडाय् थ्यंकेत थाकुयाच्वंगु खँ धाःगु दु ।

आचार संहिता कथं उम्मेदवारतय्सं कन्हय् मंगलवाः तक जक चुनाव प्रचार याये दइ । कन्हय् चान्हसिया १२ बजे तक जक चुनाव प्रचार याये खनीसा वयां लिपा मौन समय शुरु जुइ । चुनाव प्रचार याये खनीगु ई थौं व कन्हय् निन्हु जक दनि तर वने मानिगु थाय् धाःसा यक्व दनिगु जुयाः उम्मेदवारत चिन्तित समेत जुयाच्वंगु खँ धाःगु दु ।

निर्वाचन आयोगं २८ व २९ गतेयात मौन समय तोके यानाः प्रचार बन्द यायेगु व ३० गते मतदान याकेगु कार्यतालिका पित बियातःगु दु । मौन समयया इलय् सार्वजनिक थासय् जक सामाजिक सञ्जालय् तकं छुं नं प्रचार सामग्री तये मदइगु खँ धाःगु दु ।