ने. सं. ११४४ ञलाथ्व दशमी -

नक्सा पास मयासे ‘मस्जिद’ दयेकेत्यंगु रोक

येँ (नेपालभाषा टाइम्स) – थनया धरहरा नापसं मुस्मांतय्सं मस्जिद धकाः दयेकाच्वंगु छेँय् मस्जिद शैलीया गजू तयेत वडा कार्यालयपाखें रोक लगे याःगु दु । विवादय् लानाच्वंगु उगु जग्गाया लालपुर्जा दुपिं स्थानीय जग्गाधनीतय्सं छुं ई न्ह्यः अन डोजर चले यानाः छेँ थुना बिउगु खःसा मुस्मांतय्सं ‘मस्जिद थुन’ धकाः द्वपं बिउगु खः । राष्ट्रिय मुस्लिम आयोगया प्रमुखया बः कयाः अन नक्सा समेत पास मयासे छेँ दनाच्वंगुलिं वडा कार्यालयपाखें आपत्ति प्वंकूगु खः ।

मुस्मांतय्सं उगु जग्गा सरकारी नामय् लानाच्वंगु धकाः दावी याःसां सर्वोच्च अदालतं धाःसा उगु जग्गा स्थानीय रत्नकाजी महर्जन व जुजुकाजी महर्जनया नामय् लानाच्वंगु फैसला यासें अन मुस्मांतय्सं दनातःगु छेँ थुना छ्वयेत आदेश बीधुंकूगु दु । मुस्मांतय्सं अन थःपिनिगु मस्जिद दु धकाः दावी याःसां सरकारी जग्गाय् उमिगु मस्जिद गय् यानाः दत धइगु छुं प्रमाण धाःसा आः तक न्ह्यब्वयेफुगु मदुनि ।

कामपा वडा २२ या वडाध्यक्ष चिनीकाजी महर्जनं सर्वोच्च अदालतं हे उगु जग्गा रत्नकाजी महर्जन व जुजुकाजी महर्जनया नामय् लानाच्वंगु दु धकाः फैसला यायेधुंकाः वडां वहे कथं ज्या यायेगु बाहेक मेगु विकल्प मदुगु खँ कनादिल ।

‘उगु जग्गा सरकारी हे खःसां अन मस्जिद दयेकेगु लागिं सरकारं स्वीकृति बियातःगु दयेमाः । कन्हय् सरकारी जग्गा धकाः तिंख्यलय् मस्जिद वा देगः दयेकः वन धाःसा छु यायेगु ?’ वडा अध्यक्ष महर्जनं न्ह्यसः तयादिल ।