वायु प्रदुषणं स्वनिगलय् न्यासि जुइगु तकं खतरा

येँ (नेपालभाषा टाइम्स) – वंगु छुं न्हि न्ह्यवंनिसें स्वनिगलय् ख्वाउँया नापनापं वायु प्रदुषण नं अप्वया वनाच्वंगुलिं सर्वसाधारण मनूत सतर्क जुइत इनाप याःगु दु । थ्व झ्वलय् वातावरण विभागपाखें छगू अपिल हे जारी यासें ज्याथजिथि, मस्त, सासः व नुगःस्येँ सम्बन्धी ल्वय् दुपिं मनूत फयांफछि छेँनं हे पिहां मवयेत इनाप याःगु दु ।

विभागया महानिर्देशक मुकुन्दप्रसाद निरौलाया कथं स्वनिगलय् सुथय् व सनिलय् प्रदुषण तसकं अप्वयाच्वंगुलिं स्वास्थ्यय् बांमलाःगु लिच्वः लायेफु । थ्वहे समस्या नेपालगञ्ज, विराटनगरय् नं जुयाच्वंगु दु। विभागं फोहोर व मि च्याकेबलय् वायु प्रदुषण अप्वयेफइगु जूगुलिं सिँ मच्याकेत नं सुझाव बिउगु दु । नेपालय् पश्चिमी वायुया कारणं सोमवाःनिसें न्युनतम तापक्रम म्हो जुयाः वायु प्रदुषण अप्वःगु खः । वातावरण विभागया कथं वंगु सोमवाः बहनी वायु प्रदुषण तच्वकं अप्वःगु खः ।

म्हिगःया वायु प्रदुषण दकलय् अप्वःगु खँ वातावरण मन्त्रालयं धाःगु दु। वायु तह उच्च विन्दुइ थ्यनेवं नेपाः स्थित अमेरिकी राजदूतावासं छेँ दुने च्वनेबलय् नं झ्याः पाखा तिनाः, मास्क तयाः च्वनेत सुझाव बिउगु दु । आईक्यूएयरया कथं म्हिगः नेपाःया वायु प्रदुषणया तह ४८८ थ्यंगु दु । वातावरण मन्त्रालयं धाःसा म्हिगःया वायुप्रदुषण ३०० थ्यंगु धाःगु दु। थ्व स्वयां न्ह्यः थ्वहे इलय् वायु गुणस्तर १९० सीमित जुयाच्वंगु खँ नं वातावरण विभागं धाःगु दु। विभागया कथं थुगु दँय् छक्वलं वायुप्रदुषण अप्वःगुलिं स्वास्थ्यय् गम्भीर लिच्वः लाये फइगु खतरा दु ।

स्वनिगलय् दकलय् अप्वः वायु प्रदुषण यातायात साधनं न्यंकूगुलिं अनावश्यक रुपं सवारी साधन चले मयायेत तं मन्त्रालयं इनाप याःगु दु। उकथं हे स्वनिगःया अप्पा भट्टा व थीथी कलकारखानाया कुँपाखें नं प्रदुषण अप्वयाच्वंगु दु।

आईक्यूएयरया कथं म्हिगः स्वनिगःया वायु प्रदुषण ४८८ दु गुकिं यानाः विश्वय् प्रदुषित शहर मध्ये स्वनिगः म्हिगः १ नम्बरय् लाःगु दु। स्वनिगः वायु प्रदुषणय् दकलय् अप्वः प्रभावित जूगु ठहर जूसां सरकारं धाःसा उकियात कयाः आः तक छुं हे नीति मदयेकूगु खँ सीदुगु दु। सरकारं न्हापां थम्हं जारी याःगु गुलिखे निर्देशिका तकं आः वयाः पालना मयाःगु खँ सीदुगु दु। स्वनिगलय् वायु प्रदुषण जुल धाःसा उकियात म्हो यायेगु निंतिं मन्त्रिपरिषदया बैठकं २०७६ साल माघ ३ गते छगू कार्ययोजना पारित याःगु खः । तर आः वयाः आईक्यूआई ४०० नाघे जुइधुंकाः नं सरकारं छुं कथंया चिउताः मकयाच्वंगु द्वपं वातावरणविद्तय्सं बिउगु दु ।

वातावरणविद्तय् कथं आईक्यूआई ३०० थ्यनेवं सरकारं संकटकाल घोषणा यायेमाःगु खः । तर सरकारया वातावरण विभागं छगू सुचं जारी यायेगु बाहेक मेगु छुं ज्या मयाःगु नं द्वपं दु ।

सम्बन्धित बुखँ

LEAVE YOUR COMMENTS