सत्य निरुपण भंग यायेगु तयारी

येँ – जनयुद्धकालीन घटना बारे छानबिन यायेत गठन यानातःगु राष्ट्रिय सत्यनिरुपण आयोग व मेलमिलाप आयोगं यानाच्वंगु ज्याया आलोचना जुयाच्वंगु इलय् आः थ्व निगुलिं आयोगयात विस्थापित यानाः उकिया थासय् मेगु हे राजनीतिक संयन्त्र गठन यायेगु तयारी सुरु जूगु दु ।

आः जनयुद्धय् अपराध याःपिंत आममाफी बी फइगु अवस्था सिर्जना यायेगु लागिं नेपालं अन्तर्राष्ट्रिय लबिङ समेत सुरु याःगु दु । उकिया लागिं राष्ट्रपतिया मानव अधिकार सम्बन्धी सल्लाहकारया छगू पुचः बैंककय् वनाः थीथी मनूत नापलायेगु ज्या सुरु याःगु दु । द्वन्द्व पीडितया छेँजःपिंसं थ्व निगुलिं आयोगं आः तक छुं हे ज्या याये मफुत धासें थुकियात विघटन यायेत माग यानाच्वंगु दु ।

थुकियात कयाः उमिसं आन्दोलन समेत यानाच्वंगु दु । तर थुकियात भंग यानाः द्वन्द्वलिसे सम्बन्धित समस्यात गय् यानाः समाधान यायेगु धइगु खँय् धाःसा सरकार अन्यौलय् लानाच्वंगु दु । नेपाःया थीथी राजनीतिक पार्टीया नेतात समेत दुथ्याकाः बैंककय् जुइगु भेलाय् मुनाः थुकियात कयाः छगू प्याकेज तयार यायेगु ज्या जुइ फुगु खँ नं धाःगु दु ।