युएइया स्वंगू सहरय् मंकाः म्हपुजा
येँ – नेवाः पुचः युएइया तत्वावधानय् संयुक्त अरब इमिरेटस् (युएइ)या स्वंगू थीथी सहरय् नं नेपाल संवत् ११४० न्हूदँया लसताय् भिंतुना कालबिल नापं नेवाःतय् तःजिगु नखः म्हपुजा याःगु दु । पुचःया तत्वावधानय् युएइया स्वंगू सहर दुबई, उमलक्वेन व अबुधाबीइ उगु ज्याझ्वः जूगु खः ।
दुबइलय् जूगु ज्याझ्वलय् पुचःया मूछ्यांञ्जे कुमार बलामिं लसकुस यानादीगु खःसा केन्द्रीय दुजःलिसें पुचःया कासा उपसमितिया संयोजक हिरालाल श्रेष्ठ व सल्लाहकार विरेन्द्रकुमार नकःमिं नेपाल संवत व म्हपुजायात महत्वयात कयाः नुगःखँ तयादीगु खः । ज्याझ्वलय् आदिवासी जनजाति महासंघ युएइया वरिष्ठ उपाध्यक्ष विजयालक्ष्मी राई थम्हं निक्वःखुसी म्हपुजा याये खंगुलिं लसता प्वंकादिसें नेवाः सभ्यतायात सतिकं थुइके खःगुलिं नं लसता प्वंकादिल ।
उगु हे ज्याझ्वलय् नेवाः पुचः दुबइ क्षेत्रीय उपसमिति व मिसा पुचः दुबइ नं गठन याःगु खः । पुचःया दुबइ क्षेत्रीय उपसमितिया संयोजकय् दिपेश श्रेष्ठ व उपसंयोजकय् लोकबहादुर श्रेष्ठ (सुभाष) च्वनादीगु दुसा मिसा पुचःया संयोजकय् पवनमैयाँ नकःमि व उपसंयोजकय् रिद्धि श्रेष्ठ च्वनादीगु दु । नेवाः पुचः युएइ न्वकु राजेश प्रधानयात दुबइया संयोजन यायेगु भाला बिउगु दु ।
थुकथं हे उमलक्वेन सहरय् जूगु म्हपुजा ज्याझ्वः नेपाल संवत्या प्रवर्तक राष्ट्रिय विभूति शंखधर साख्वाया किपाय् माल्यार्पण यासें न्ह्याःगु खः । पुचःया प्रमुख सल्लाहकार प्रमोद श्रेष्ठं नेपाल संवत्, म्हपुजा व नेवाः परम्रपराय् सगंया महत्वयात कयाः नुगःखँ तयादीगु खः ।
थन जूगु ज्याझ्वलय् नेपालं झायादीम्ह केशवबहादुर प्रधानयात थाकुलि यााः म्हपुजा न्ह्याकूगु खः ।
लक्ष्मण श्रेष्ठया संयोजन व व्यवस्थापनय् न्ह्याःगु म्हपुजाय् निरु श्रेष्ठ, अनिता श्रेष्ठ, कविता श्रेष्ठ, कल्पना श्रेष्ठ, शलिसा उदास लगायतं थीथी व्यवस्थापनया भाला कयादीगु खः ।अथे हे युएइया मेगु सहर अबुधावीइ जूगु म्हपुजा ज्याझ्वःया संयोजन पुचःया केन्द्रीय दुजःनापं अबुधावी क्षेत्रीय संयोजक सुनिलमान श्रेष्ठं यानादीगु खः ।
थन जूगु म्हपुजाय् भुवन नकःमि, अनिल रंजितकार राजेश श्रेष्ठ, विनोद रंजित, गोपाल महर्जन, अबुधावी मिसा पुचलं आवश्यक ग्वाहालि याःगु खः । राजेश श्रेष्ठं लसकुस यासें न्ह्याःगु ज्याझ्वलय् संयोजक श्रेष्ठं म्हपुजा सम्बन्धी जानकारी बियादीगु खःसा सांस्कृतिक ज्याझ्वलय् सुस्मिता श्रेष्ठ व बबिता प्रधानं हुलाप्याखं न्ह्यब्वयादीगु खः ।
म्हपुजाय् सहभागि सकसितं नेपाली चुल्हो रेष्टुेन्टं भ्वय्या व्यवस्था याःगु खः । अबुधावीइ जूगु ज्याझ्वलय् पुचःयात विशेष योगदान बिउगु धासें सुस्मिता श्रेष्ठ, भिमनारायण श्रेष्ठ, अवानी श्रेष्ठ, विनोद रंजित, मिना श्रेष्ठ, अन्जना नकःमि, अनिल रंजितकार, रञ्जिना गुरुङ, अर्चना सिख्राकार, रजिना जोशीयात हनापौ देछासे सम्मान नं याःगु खः ।
LEAVE YOUR COMMENTS