गठबन्धनया तालमेल क्वचाल

येँ (नेपालभाषा टाइम्स)- न्यागू दलीय गठबन्धनं स्थानीय तहया निर्वाचनय् महानगरपालिका व उपमहानगरपालिकाया प्रमुख व उपप्रमुख पदय् उम्मेदवारया सिट बाँडफाँडय् सहमति जूगु दु । प्रधानमन्त्री शेरबहादुर देउवा समेत गठबन्धनया शीर्ष नेतातय्गु बैठकं उगु सहमति याःगु खः ।

सहमति कथं कांग्रेसं येँ, यल व विराटनगर महानगरपालिकाया प्रमुखय् उम्मेदवारी बीगु जूगु दुसा वीरगञ्ज, भरतपुर व पोखराय् उपप्रमुखय् थनीगु जूगु दु । उकथं हे कांग्रेसं धरान, इटहरी, कलैया, बुटवल, तुलसीपुर, नेपालगञ्ज व धनगढी उपमहानरपालिकाया प्रमुख लिसें जितपुर–सिमरा, घोराही व हेटौंडा उपमहानगरपालिकाया उपप्रमुखय् उम्मेदवारी बीगु जूगु दु ।

नेकपा (माओवादी केन्द्रं) भरतपुर महानगरपालिकाया प्रमुखय् व यल महानगरपालिकाया उपप्रमुखय् उम्मेदवारी बीगु सहमति जूगु दु । उकथं हे माओवादी केन्द्रं जितपुर–सिमरा व घोराही उपमहानगरपालिकाया प्रमुख व धरान, धनगढी उपमहानगरपालिकाया उपप्रमुखय् उम्मेदवारी बीगु जुइ ।

गठबन्धनया मेगु घटक नेकपा (एकीकृत समाजवादीं) पोखरा महानगरपालिकाया प्रमुख व येँ महानगरपालिकाया उपप्रमुखय् उम्मेदवारी बीगु सहमति जूगु दु । अथे हे नेकपा एसं हेटौंडा उपमहानगरपालिकाया प्रमुख व इटहरी, बुटवल, तुलसीपुर उपमहानगरपालिकाया उपप्रमुखय् उम्मेदवारी बीगु सहमति जूगु दु ।
अथे हे जनता समाजवादी पार्टी नेपालं वीरगञ्ज महानगरपालिकाया प्रमुखय् व विराटनगर महानगरपालिकाया उपप्रमुख लिसें जनकपुर उपमहानगरपालिकाया प्रमुख व कलैया व नेपालगञ्ज उपमहानगरपालिकाया उपप्रमुखय् उम्मेदवारी बीगु सहमति जूगु दु ।

न्यागू दलीय गठबन्धनं थ्व स्वयां न्ह्यः जारी याःगु मापदण्ड, सहमतिया मर्म व भावना कथं सम्बन्धित समितिया बैठक च्वनाः फयांफछि याकनं सिट बाँडफाँड व उम्मेदवार ल्ययेत निर्देशन बिउगु दु । छुं जुयाः सहमति जुइ मफुगु अवस्था वल धाःसा अज्याःगु थासय् न्यागू दलीय गठबन्धन दुने हे मित्रवत् प्रतिस्पर्धा याये फइगु समझदारी नं याःगु दु ।

म्हिगः जूगु सहमतिइ कांग्रेसया सभापति लिसें प्रधानमन्त्री शेरबहादुर देउवा, माओवादी केन्द्रया अध्यक्ष पुष्पकमल दाहाल, नेकपा एसया माधव नेपाल, जसपाया उपेन्द्र यादव व राष्ट्रिय जनमोर्चाया उपाध्यक्ष दुर्गा पौडेलं हस्ताक्षर याःगु दु ।