थथुपुँइ आचागू क्वचाल

येँ(नेपालभाषा टाइम्स)- थथपुँइ संरक्षण समितिया ग्वसालय् वंगु शनिवाः थथुपुँइ आचागू जुल । वंगु चिल्लथ्व द्वादशि शनिवाःकुन्हु थीथी ज्याझ्वः यासें थथुपुँइ आचागू क्वचाःगु खः ।

समितिया नायः प्रा. शान्तहर्ष वज्राचार्यया सभापतित्वय् जूगु ज्याझ्वलय् मूपाहांकथं झायादीम्ह थथुपुँइ लागाया मूल चक्रेश्वर नांजाःम्ह साहित्यकार फणीन्द्ररत्न वज्राचार्यं दीप प्रज्वलन यासे ज्याझ्वःया उलेज्या यानादीगु खः ।

गुरु राजु वज्राचार्यपाखें स्वस्ति वचान, दुर्गति परिशोधन धारणी व दानगाथा पाठ यानादीगु ज्याझ्वलय् झिंछम्ह थाय्पाकथं पद्मानन्द वज्राचार्य, प्रकाश वज्राचार्य व नरेन्द्ररत्न वज्राचार्यया उपस्थिति दुगु खः ।

मूपाहां मूल चक्रेश्वर वज्राचार्यलिसें थाय्पापिंपाखें मंकाःकथं ‘आर्यनाम मञ्जुश्री नामसंगीति स्तोत्र’ सफू पितब्वज्या यानादीगु ज्याझ्वलय् प्यंगू पुँइया विद्यार्थीपिंत छात्रवृत्ति बीगु निंतिं डा. भुवनवज्र वज्राचार्यं थः मांअबुया नामं ‘पद्मश्री पूर्णप्रभा स्मृति छात्रवृत्ति कोष’या निंतिं छगू लख दां लःल्हानादीगु खः ।

उगु इलय् थथुपुँइया निंतिं धर्मदेवरत्न, सम्पूर्णरत्न, ईश्वरीरत्न, दिनेशरत्न मदनरत्न, अरुणकुमारपिंसं आर्थिक ग्वाहालिया निंतिं दां लःल्हानादीगु खःसा वय्कःपित मूपाहांपाखें हनापौ देछानादीगु खः ।

अथे हे चक्रेश्वर समितिया नायःलिसें चक्रेश्वर प्रा. शान्तहर्षपाखें प्यंगू पुँइया चक्रेश्वरपिं फणीन्द्ररत्न (झ्वाःबहाः), धर्मदेवरत्न (क्वाःबहाः), रेवरत्न (ध्वाखाबहाः) व प्रा. शान्तहर्ष (गंबहाः)यात म्हतिं न्यासः तका दां लःल्हानादीगु खः ।

थुगुसी गुथि पाः फयादीपिं प्यम्ह पाःलाःपिं विजयलाल, सम्पूर्णरत्न, सूर्यरत्न व मदनरत्नपिंत समितिया नायःपाखें हनापौ लःल्हानादीगु ज्याझ्वलय् समितिया दुजः मुनिन्द्ररत्न वज्राचार्यं सुभाय् देछानादीगु खः ।