२ करोड तकया त्यासाय् कर चुक्ता म्वाल
येँ – बैंकर्सतय् माग कथं नेपाल राष्ट्र बैंकं त्यासाया नीतिइ हिउपाः हःगु दु । राष्ट्र बैंकं सोमवाः मध्यावधि समिक्षा जारी यासें त्यासाय् सहज नीति हःगु खः । राष्ट्र बैंकं आः निगू करोड तक त्यासा कायेत कर चुक्ता प्रमाणपत्र म्वाःगु व्यवस्था याःगु खः । न्हापा ५० लाखं अप्वः त्यासा कायेत हे कर चुक्ता प्रमाणपत्र माःगु व्यवस्था यायेवं बैंकय् त्यासा काइपिं हे म्हो जुया वनाच्वंगु धासें बैंकतय्सं राष्ट्र बैंकयात थ्व व्यवस्थाय् हिउपाः हयेमाःगु माग यानाच्वंगु खः ।
राष्ट्र बैंकं बैंकर्सतय् मागयात सुनुवाइ याःसां माइक्रोफाइनान्सतय्त लाभांस बीत धाःसा कडा याःगु दु । राष्ट्र बैंकं आः माइक्रोफाइनान्सतय्सं २० प्रतिशतं अप्वः लाभांस बीत कडा व्यवस्था याःगु खः । न्हूगु व्यवस्था कथं आवंलिं २० प्रतिशतं अप्वः लाभांस बीमाल धाःसा २० प्रतिशत स्वयां च्वय्या लाभांसया २५ प्रतिशतं जुइगु रकम ग्राहक संरक्षण कोष व २५ प्रतिशतं जुइगु रकम सामाजिक उत्तरदायित्व कोषय् दुथ्याकेमाःगु व्यवस्था याःगु दु ।
राष्ट्र बैंकं आः माइक्रोफाइनान्सतय्सं २० प्रतिशतं अप्वः लाभांस बीत कडा व्यवस्था याःगु दु ।
थ्व व्यवस्था नगद व शेयर लाभासं निगुलिं नं लागू जुइ । थ्व व्यवस्था कथं २० प्रतिशतं अप्वः लाभासं बी चाहे जूगु संस्थाय् २० प्रतिशतं अप्वः लाभांसया बछि ब्वः सामाजिक हितकारी ज्याय् खर्च यायेमाःगु व बछि लाभांस जक शेयरधनीतय् ल्हातय् लाइगु जूगु दु । थ्व ल्याखं ५० प्रतिशत लाभासं बीफुगु संस्थां नं लाभासं बीबलय् ३५ प्रतिशत जक शेयरधनीया ल्हातय् लाइगु जूगु दु ।
माइक्रोफाइनान्सय् लाभांस बीगु नीति हःगु कडाइ नं यानाः माइक्रोफाइनान्सया शेयर बजारय् नं तःधंगु लिच्वः लाइगु खँ विज्ञतय्सं धाःगु दु ।
सोमवाः पितबिउगु अर्ध वार्षिक समिक्षाय् राष्ट्र बैंकं छेँ बुँ त्यासाय् नं सहज यानाबिउगु दु । स्वप्रयोजनया निंतिं दयेकीगु वा न्याइगु छेँया निंतिं बीगु त्यासाय् ऋण भुक्तानी आम्दानी अनुपातय् अप्वलय् ६० प्रतिशत कायम यायेगु व्यवस्था याःगु दु ।
अथेहे स्वप्रयोजनया निंतिं दयेकीगु वा न्याइगु छेँय् व ५० लाख निसें २ करोड तकया कृषि, पर्यटनया लिसें साना तथा मझौला व्यवसायया निंतिं कर दाखिला भ्वँय्या आधारय् त्यासा बीगु व नविकरण यायेफइगु व्यवस्था नं याःगु दु । थ्व व्यवस्था त्यासा बीत सहज जुइगु बैंकर्सतय्सं धाःगु दु ।
LEAVE YOUR COMMENTS