‘हलिं नेवाः कोष’ नीस्वनेगु घोषणा यासें विश्व नेवाः सम्मेलन क्वचाल

येँ- शुक्रवाः व शनिवाः निन्हुयंकं जूगु विश्व नेवाः सम्मेलन म्हिगः क्वचाल । लिसें विश्व नेवाः दिवस नं हनेगु ज्या जूगु खः। आः दँय्दसं हरेक मार्च महिनाया अन्तिम शनिवाः विश्वन्यंकं हे हलिं नेवाः न्हि हनेगु परम्परा नं न्ह्याका यंकेगु घोषणा म्हिगः जूगु खः ।

म्हिगः सम्मेलनं ७ गू बुँदा दुगु छगू घोषणापत्र जारी यासें सम्मेलन समापन याःगु खः । घोषणापत्रय् दँय्दसं मार्चया अन्तिम शनिवाः हलिं दिवस न्हि हनेगु, विकासया नामय् स्वनिगया जनतायात विस्थापित याये कथं सरकारं हःगु योजनाया विरोधय् अन्तर्राष्ट्रिय रुपं दबाब सिर्जना यायेगु, नेपालय् ल्हाइगु फुक्कं भाय्यात ‘नेपाली भाषा’ हे धायेगु, नेवाः
साहित्य, कला, संस्कृति, पत्रकारिता विकासया लागिं ‘हलिं नेवाः कोष’ नीस्वनेगु, नेवाः वाङ्मययात अन्तर्राष्ट्रियकरण याना यंकेगु आदि खँ दुथ्याः ।

सम्मेलनया समापन यासें वल्र्ड नेवाः अर्गनाइजेशनया नायः सिजन श्रेष्ठं अर्गनाइजेशनया स्वक्वःगु मेगु तःमुँज्या व स्वक्वःगु विश्व नेवाः सम्मेलन आः नेपाःया स्वनिगलय् हे यायेगु जुइ धकाः नं घोषणा यानादिल ।

थनया नेपाः ब्यांक्वेटय् शुक्रवाः छगू ज्याझ्वःया दथुइ वाङ्मय शताब्दी पुरुष सत्यमोहन जोशीं त्वाःदेवा मत च्याकाः सम्मेलनया उलेज्या यानादीगु खः । सम्मेलनय् विश्वया १७गू देय् प्रतिनिधिपिंसं ब्वति काःगु खः । सम्मेलन उलेज्या समारोहय् हे नेवाः आन्दोलनया हस्तीपिं सत्यमोहन जोशी, पद्मरत्न तुलाधर व माणिकलाल श्रेष्ठयात बेतालिं चिकाः हनेगु ज्या नं जूगु खः ।

उलेज्याय् थीथी व्यक्तित्वंपिंसं भिंतुना न्वचु बियादीगु खःसा प्रा.डा. त्रिरत्न मानन्धरं मूवक्ताया रुपय् न्वचु तयादीगु खः । सम्मेलनया लिपांगु न्हि म्हिगः स्वनिगलय् विकासया नामय् स्थानीय जनतायात उठिबास यायेगु ज्या जुयाच्वंगु खँयात कयाः ‘झीगु बसोबास, झीगु सरोकार’ विषयय् छगू प्यानल डिसकस ज्याझ्वः नं जूगु खः । सम्मेलनं नेवाः आदिभूमिं नेवाःतय् विस्थापित यायेगु ज्याय् राज्यं हयाच्वंगु थीथी ग्वसाःयात कडा रुपं प्रतिवाद यायेगु ज्या याःगु खः ।

नेपालय् थ्व ज्या जुयाच्वंगु हे इलय् विश्वया मेमेगु देशय् नं नेवाः दिवस हनेगु ज्या जुयाच्वंगु खँ सीदुगु दु ।