ट्रम्पं पत्रकारयात जातिवादी टिप्पणी याःगु धासें विरोध

येँ – कोरोना भाइरस (कोभिड-१९)या महामारी जुइधुंकाः अमेरिकाया राष्ट्रपति डोनाल्ड ट्रम्पं नियमित रुपं पत्रकार सम्मेलन यानाच्वंगु दु । तर अज्याःगु पत्रकार सम्मेलन न्ह्यावलें विवादय् वयाच्वंगु दु । गवलें पत्रकार सम्मेलनया इलय् मास्क मतःगु खँय् विवाद जूगु खःसा गवलें स्वास्थ्य अधिकारीत स्वयां ज्वः मलागु खँ पत्रकारतय्त धाःगुलिं विवाद वयेगु यानाच्वंगु दु । अथेहे गवलें मखुगु वासः नयाः कोरोनाया उपचार जुइफुगु धासें छगूं लिपा मेगू खँय् विवादित जुइगु यानाच्वंगु दु ।

थुगुसी राष्ट्रपति ट्रम्पं छगू ‘जातिवादी’ टिप्पणी याःगु धासें विवाद सुरु जूगु दु । ह्वाइट हाउसय् जूगु नियमित पत्रकार सम्मेलनया झ्वलय् छम्ह एशियाली मूलया अमेरिकी पत्रकारं न्यंगु न्ह्यसलय् राष्ट्रपति ट्रम्पं धयादिल, ‘थ्व विषयलय् चीनयात न्यं हुं ।’

सिबिएस न्यूजया पत्रकार वेच्या च्याङं छाय् ट्रम्पं कोरोनाया टेस्ट यायेगु खँय् अमेरिकां मेगू देय् स्वयां तसकं बांलाक यानाच्वंगु खँ धायेगु यानाच्वंगु दु, छाय् थ्व छगू विश्व प्रतिस्प्रर्धाया खँ जुयाच्वंगु दु धकाः न्ह्यसः न्यंगु खः ।

एशियाली मूलया अमेरिकन पत्रकारं न्यंगु न्ह्यसलय् राष्ट्रपति ट्रम्पं थ्व विषयलय् छं चीनयात न्यं धकाः लिसः बियादीगु खः । राष्ट्रपति ट्रम्पया थ्व धापु जातिवादी टिप्पणी जूगु धासें विवादय् लाःगु दु । चीनय् बुम्ह अमेरिकी पत्रकारयात थज्याःगु टिप्पणी याःगुलिं धासें विरोध जूगु दु ।

वयां लिपा सिएनएनया पत्रकार क्याटलान कोलिन्सं थःगु न्ह्यसः इलय् मन्यंगु धासें राष्ट्रपति ट्रम्पं वय्कःयात नं न्ववाये मबिउसें पत्रकार सम्मेलन आकाझाकां क्वचायेकूगु खः ।

भिडियाे साभार ः सिबिएस न्यूज

सम्बन्धित बुखँ

LEAVE YOUR COMMENTS