ने. सं. ११४४ कछलागा षष्ठी -

सत्य निरुपण नियुक्तिइ विवाद

द्वन्द्वपीडितपाखें आयोगया प्रस्तावित दुजःतय् नां अस्वीकार

येँ – ताः ईया विवाद लिपा हानं गठन जुइत्यंगु सत्य निरुपण तथा मेलमिलाप आयोग व बेपत्ता छानबिन आयोगय् च्वनेत इच्छुकपिं धकाः सार्वजनिक जूगु नांयात कयाः द्वन्द्व पीडिततय् संगठनं आपत्ति क्यंगु दु । वंगु ७ महिना न्ह्यवंनिसें खाली जुयाच्वंगु निगुलिं आयोगय् आः हानं न्हूपिं पदाधिकारी नियुक्त यायेगु लागिं सरकारं छगू छनौट कमिटी गठन याःगु दु ।

उगु कमिटीं आः नकतिनि आयोगय् च्वनेत इच्छुकपिं धासें ६१ म्ह मनूतय् नांधलः सार्वजनिक याःगु खः । तर थुकी फुक्क हे पुलांपिं हे मनूतय्गु नां जक दुथ्यात व द्वन्द्व पीडितया समस्या समाधान याये फुपिं सुं हे खने मंत धासें द्वन्द्व पीडिततय् संगठन ‘द्वन्द्व पीडित साझा चौतारीं’ विरोध याःगु दु ।

छनौट समितिं आः सार्वजनिक याःपिं मनूतय् नां स्वयेबलय् द्वन्द्व पीडितयात न्याय बीगु ज्याय् राज्य पटक्क हे गम्भीर मजूगु सी दत धासें चौतारीं आः थुकिया विरुद्ध आन्दोलन यायेगु तयारी जुयाच्वंगु जानकारी बिउगु दु ।

थ्व सावर्जनिक जूगु नांयात थःपिंसं स्वीकार याये मफइगु खँ नं चौतारीं धाःगु दु । उखे सरकारं धाःसा आः नां जक सार्वजनिक जूगु खः, उकी सुयातं ल्यःगु मदुनि धासें हथासं विरोध यायेमाःगु आवश्यकता मदु धाःगु दु ।

मन्त्रिमण्डलय् अझं भागबन्डा विवाद
येँ – सरकारं मन्त्रिमण्डल पुनर्गठन यायेगु धाःसां नं पार्टी दुने भागबण्डा मिले मजुयाः पुनर्गठन यायेत समस्या जुयाच्वंगु खँ सीदुगु दु । निम्ह अध्यक्ष प्रधानमन्त्री केपी ओली व मेम्ह अध्यक्ष पुष्पकमल दाहाल दथुइ मन्त्री दयेकेगु खँय् छगू हे मत मजुयाच्वंगु खँ सूत्रं धाःगु दु ।

आइतवाः च्वंगु सचिवालयया बैठकं प्रधानमन्त्री केपी ओली शर्मायात फुक्कं पक्षयात कःघानाः सन्तुलित मन्त्रिमण्डल दयेकेत सुझाव बिउगु खः । तर प्रम ओली व दाहालया दथुइ आः न्हू नियुक्ति याइपिं मन्त्रीया बारे सहमत जुइ मफयाः हे पुनर्गठनया ज्या थाति लानाच्वंगु खँ धाःगु दु ।

पार्टीइ मन्त्री जुइपिं आकांक्षीत अप्वः दुगुलिं यानाः नं मन्त्रिमण्डल गठन यायेगु ज्याय् समस्या वयाच्वंगु खँ धाःगु दु । मन्त्रिमण्डल गठन याये स्वयां न्ह्यः हे मन्त्रिमण्डल गठन जुइगु हल्ला तच्वयेवं आकांक्षीत नं अप्वया वंगु खः । आःया मन्त्रिमण्डलय् दुपिं थ्व थ्व मन्त्रीयात चीकेगु धकाः वयाच्वंगु हल्लाया कारणं यानाः मन्त्रिमण्डल पुनर्गठन यायेत समस्या जुयाच्वंगु खँ धाःगु दु ।