अमेरिकाया राजधानी वाशिंगटनय् यँयाः
येँ(नेपालभाषा टाइम्स)÷अमेरिकाया राजधानी वाशिंगटन डिसी महानगरय् तःजिक येँयाः नखः हंगु दु । नेवाः अर्गनाईजेसन अफ अमेरिका (एनओए )या ग्वसालय् झिंनिक्वःखुसी यँयाः नखः हंगु खः ।
नेपालं पिने सिक्किम लिपा न्हापांखुसी अमेरिकाय् कुमारिया खः सालाः यँयाः न्यायेकेगु झ्वलय् एनओएपाखें वंगु सेप्टेम्बर २१ शनिवाःकुन्हु मेरिल्याण्डय् यँयाः नखः हंगु खः । उगु इलय् मेरिल्याण्ड राज्यपाखें प्रतिनिधित्व यानादीपिं सांसदपिं सराह एस वोलेक ,विलियम ग्रेगरी विम्स तथा ह्यारी भण्डारीं एनओएयात हनेज्या यासें भिंतुना देछानादीगु खः । लिसें राज्यया सामुदायिक अधिकारी क्रिस्टिना पोइ, मोन्टगोमेरी काउन्टीया केट चान्सं नं एनओएयात हनेज्या यासें नुगःखँ तयादीगु खःसा मेरिल्याण्ड राज्यया दक्षिण एसियाली अमेरिकन मामला सम्बन्धी गभर्नर आयोगया आयुक्त नेपाली मूलया बिशाल भण्डारीया नं उपस्थिति दुगु खः ।
एनओएया नायः महिन्द्र प्रधानं लसकुस यानादीगु ज्याझ्वलय् वासव राजोपाध्यायं यँया नखःया थीथी पक्षयात कयाः कुलादीगु खः । उगु इलय् अमेरिकाय् हे जन्म जूपिं निगूगु पुस्ताया नेवाः मस्तय्सं यँयाःलिसे स्वापू दुगु नाटक व माकःप्याखं न्ह्यब्वःगु खःसा दीपिका राजभण्डारीं कुमारि चचाप्याखं न्ह्यब्वःगु खः ।
वयां लिपा वन्जला प्रजापतियात कुमारिया रुपय् प्रतिस्थापन यानाः उपस्थित सकसिनं कुमारिया खः साःगु खः । कुमारिया खःया न्ह्यः न्ह्यः पुलुकिसि, लाखे प्याखं नं न्ह्यब्वःगु खः ।
मेरिल्याण्डया ब्ल्याक हिल क्षेत्रीय उद्यान (रिजनल पार्कय् जूगु यँयाःया ज्याझ्वः स्थानीय ईकथं न्हिनसिया १२ निसें ५ः३० ताः तक न्ह्याःगु खः । ज्याझ्वःया लिपांगु ब्वय् अन ब्वयातःगु समय्बजि प्रसादया रुपय् उपस्थित सकसित इना बिउगु खः ।
थनिं स्वयां २३ दँ न्ह्यः भाषा, कला, संस्कृतिया प्रवद्र्धन व संरक्षण यायेगु ल्याखं अमेरिकाय् च्वनाच्वंपिं नेवाःतय्सं नीस्वंगु एनओएपाखें थुगुसी झिंनिक्वःखुसी यँयाः हंगु खः ।
LEAVE YOUR COMMENTS