‘कोशी’ विरुद्ध प्रदर्शन
येँ (नेपालभाषा टाइम्स)÷प्रदेश १ या नां ‘कोशी’ तःगुलिं म्हिगः राजधानी येँ लगायेत देय्या थीथी थासय् विरोध ज्याझ्वः जूगु दु ।
‘कोशी प्रदेश’ या विरुद्ध म्हिगः थीथी राजनीतिक दलया आवद्ध ३३ गू जातीय संगठनतय्सं झापाय राजमार्ग बन्द याना बिउगु खः । प्रदर्शनकारी संघीय लोकतान्त्रिक राष्ट्रिय मञ्चया केन्द्रीय महासचिव धनराज सुब्बां पहिचान सहितया नां तयेमाः धकाः ताः इलंनिसें माग याना वयाच्वनागु खःसां उकियात वेवास्ता याःगुलिं थःपिं आन्दोलनय् वयेमाःगु खँ धयादीगु दु ।
म्हिगः जसपा, आदिवासी जनजाति महासंघ सहितया घटकं झापाय् यातायात बन्द याःगु खः । प्रदेश व केन्द्रीय सरकारं थःपिनिगु मागया सुनुवाइ मयात धाःसा थप आन्दोलन यायेगु ख्याच्वः नं महासचिव सुब्बां बियादीगु दु । म्हिगः झापा बन्दया झ्वलय् प्रहरीं २२ म्हेसित ज्वंगु दु ।
उकथं हे कोशी नामाकरणया विरोधय् खोटाङय् नं म्हिगः प्रदर्शन जूगु दु । कोशी नां खारेज यानाः किरात प्रदेश तयेमाःगु माग यासें किरात चोकय् म्हिगः सुथंनिसें प्रदर्शन याःगु खः । उमिसं मध्यपहाडी लोकमार्ग नं पना बिउगु खः ।
अथे हे सुनसरीया धरानय् नं बन्द याःगु दु । म्हिगः याःगु बन्द आह्वानया कारणं म्हिगः धरान ठप्प जूगु खः । म्हिगः प्रदर्शनकारीतय्सं कोशी प्रदेशया नां तत्काल खारेज यानाः लिम्बुवान–किरात नामाकरण यायेत माग याःगु खः ।
प्रदर्शनकारीतय्सं धरान–धनकुटाया मू लँय् मोटरसाइकल तकं चले याके मबिउगु खः । म्हिगः धरानया मू मू चोकय् नेपाल प्रहरी व सशस्त्र प्रहरी तैनाथ यानातःगु खः ।
म्हिगः राजधानी येँया फिब्व ख्यलय् नं थीथी संस्थातय्सं कोशी प्रदेश विरुद्ध जुयाच्वंगु आन्दोलन प्रति ऐक्यवद्धता क्यनेत प्रदर्शन याःगु खः ।
LEAVE YOUR COMMENTS