दुर्गा प्रसाईंया आन्दोलन फासांफुसुं, कार्यकर्ता लिहां वनेगु शुरु
येँ (नेपालभाषा टाइम्स)÷येँय् तामझामपूर्वक शुरु जूगु झापाली मेडिकल व्यवसायी दुर्गा प्रसाईंया आन्दोलन फासांफुसुं जुया वंगु दु । स्वंगू लाख मनू क्वकयाः लछि
तक न्ह्याकेगु धकाः घोषणा यानातःगु थ्व आन्दोलनया प्यम्ह न्याम्ह प्रमुख मनूत ज्वंबलय् मेपिं सतकय् वयेत थारान्हूगु दु ।
थ्व झ्वलय् आन्दोलन ताःलाइगु सम्भावना खने मदयेवं प्रसाईं येँय् हयातःपिं कार्यकर्तात धमाधम लिहां वनेगु शुरु जूगु दु । प्रसाईंया कार्यकर्तात येँया गौशालाया धर्मशाला व थीथी लजय् च्वनाच्वंगु खः । उमित विशेष यानाः सहकारी व लघुवित्तपाखें कयातःगु त्यासा मिनाहा याना बी धकाः येँय् ब्वना हःगु खः । तर थःपिनि माग पूवनीगु सम्भावना मखनेवं उपिं धमाधम लिहां वनेगु शुरु जूगु खः । अझ विशेष यानाः मधेसया थीथी थासं येँय् हयातःपिं कार्यकर्तात थन ख्वाउँ अप्वयाः चिकुया वयेवं याकन याकनं येँ त्वःताः पिहां वंगु खः ।
येँय् वःपिं कार्यकर्तात फुकसित प्रसाईंनं नये–त्वनेगु निःशुल्क यायेगु धकाः व्यवस्था यानातःगु खः । तर प्रसाईं थः हे छेँनं पिहां मवःबलय् कार्यकर्तात अलपत्र जूगु खँ धाःगु दु ।
दुर्गा प्रसाईं हिन्दू राज्य व राजतन्त्र लित हयेगु धइगु नारा बियाः थ्व आन्दोलन न्ह्याकूगु खः । तर थ्वयात येँया सुं हे जनतां साथ मबिल । लिसें स्वयम् पुलांम्ह जुजु ज्ञानेन्द्र शाहं तकं वय्कःयात साथ मबिसे झापा वनाः च्वना बिउगु खः । पुलांम्ह जुजुं साथ मबीवं प्रसाईंया विश्वसनीयता समेत गुमे जूगु खँ धाःगु दु । थ्व आन्दोलनयात राप्रपां समेत समर्थन मयाःगु खः । पुलांम्ह जुजु झापा वनेवं राप्रपाया कार्यकर्तात नं झापाय् हे सक्रिय जुयाच्वंगु दु । अन ज्ञानेन्द्र शाहं राप्रपा नेतातय्त नाप नं लाःगु दु ।
LEAVE YOUR COMMENTS