डे. गभर्नर श्रेष्ठ विरुद्ध षडयन्त्र
न्हूम्ह गभर्नर ल्यये न्ह्यः शुरु जुल खतरनाक चलखेल
येँ – नेपाल राष्ट्र बैंकया न्हूम्ह गभर्नर नियुक्ति याइगु ई न्ह्यःने थ्यनेवं उकिया प्रवल दावेदार डेपुटी गभर्नर शिवराज श्रेष्ठयात प्रतिस्पर्धां चीकेत राष्ट्र बैंक व प्रधानमन्त्री कार्यालय दुने तःधंगु चलखेल शुरु जूगु दु । थ्व झ्वलय् डेपुटी गभर्नर श्रेष्ठयात सम्पत्ति शुद्धीकरण सम्बन्धी द्वपं बियाः मन्त्रिपरिषद्पाखें हे छानबिनया आदेश बीकेगु ज्या जूगु दु ।
तप्यंक मन्त्रिपरिषदं हे छानबिनया ज्या न्ह्याकेगु धाःगुलिं वय्कः तप्यंक निलम्बनय् समेत लाःगु दु । विज्ञ सूत्रं धाः कथं वय्कःया विरुद्ध छानबिन यायेगु लाकि मयायेगु धइगु निर्णय राष्ट्र बैंकया सञ्चालक समितिं यायेमाःगु खः । तर अथे यायेबलय् प्रक्रिया ताःहाकः जुइ धकाः तप्यंक मन्त्रिपरिषदं आदेश बिउगु खः ताकि वय्कःयात तप्यंक व याकनं निलम्बन याये फयेमा ।
थ्वहे चैत्र १४ गते वर्तमान गभर्नर डा. चिरञ्जीवी नेपालया कार्यकाल फुइत्यंगु दु । उकिं न्हूम्ह गभर्नरया लागिं माघं नां सिफारिस यायेमाः । नां सिफारिस याइबलय् निम्ह डेपुटी गभर्नरत मध्ये छम्हेसिया नां अनिवार्य रुपं दुथ्याकेमाः । आः दुपिं निम्ह डेपुटीत मध्ये चिन्तामणी शिवाकोटी स्वयां श्रेष्ठ यक्व क्षमतावान जूगुलिं वय्कःया नां सिफारिसय् समेत मलाकेगु लागिं थ्व चलखेल जूगु सूत्रया दावी दु ।
कर्मचारीतय् विरुद्ध छानबिनया ज्या अख्तियारं यायेमाःगु खः । तर अख्तियारयाके कारवाहीया लागिं छुं प्रमाण मदुगु जुयाः सम्पत्ति शुद्धीकरण समितियात छ्यःगु खँ धाःगु दु । सम्पत्ति शुद्धीकरण विभागया महानिर्देशक रुप नारायण भट्टराई व राष्ट्र बैंकया मेम्ह डेपुटी गभर्नर चिन्तामणी शिवाकोटी निम्हं मोरङयापिं व मचांनिसेंया पासापिं खः ।
उकिं शिवाकोटीं हे भट्टराईयात छ्यलाः कारवाहीया प्रक्रिया न्ह्याकूगु नं सूत्रया दावी दु । सम्पत्ति शुद्धीकरण विभागं श्रेष्ठ विरुद्ध सम्पत्ति सम्बन्धी गुगु आरोप बिउगु खः उकिया आधार धाःसा श्रेष्ठं स्वदँ न्ह्यः बियातःगु सम्पत्ति विवरण खः । श्रेष्ठं बियातःगु उगु विवरण बाहेक मेगु सम्पत्ति विभागं लुइकाः क्यने फुगु नं मदुनि ।
स्वदँ न्ह्यः थम्हं हे बियातःगु सम्पत्ति विवरणयात आधार दयेकाः आः गभर्नर नियुक्तिया इलय् वयाः कारवाही न्ह्याकेगु धकाः तयारी याःगु खनाः श्रेष्ठ थः हे अजूचायादीगु दु ।थ्व प्रक्रियाय् राष्ट्र बैंकया कार्य–कारी निर्देशक लक्ष्मी निरौला नं सक्रिय जुयाच्वंगु खँ सीदुगु दु । छुं जुयाः श्रेष्ठयात बर्खास्त याये फत धाःसा वय्कःया थासय् निरौलायात हे नियुक्त यायेगु खँ जुयाच्वंगु दु ।
भट्टराई, निरौला व शिवाकोटी स्वम्हं छगू हे लागाया पासापिं खः । थुमिगु हे पुचलं अर्थमन्त्री डा. युवराज खतिवडायात समेत प्रभावित याःगु खनेदु । वहे कारणं खतिवडां श्रेष्ठ विरुद्ध मन्त्रिपरि–षद्य् हे प्रस्ताव तयेकेगु ज्या याःगु खः । थ्व बाहेक नं श्रेष्ठ विरुद्ध थीथी द्वपं बिउगु दु । तर छुं हे द्वपं ठोस मजू ।
वय्कःयात बैंकतय्गु खराब कर्जा सुचुकेगु ज्या याःगु, सम्पत्ति शुद्धीकरण निवारण सम्बन्धी सूचना संकलन यायेगु ज्याय् ग्वाहालि मयाःगु, एनसेलयात कर छुट बीकेत ग्वाहालि याःगु थेंज्याःगु द्वपं नं बियातःगु दु । तर सूत्रया दावी कथं राष्ट्र बैंकं याइगु थ्व फुक्कं ज्याया निर्णय सञ्चालक समितिं याइगु खः, वय्कः याकःचां याइगु मखु ।
यदि थ्व निर्णय गलत खःसा वय्कः जक मखु उकी हस्ताक्षर याःपिं सञ्चालक समितिया सकलें दुजःत दोषी ठहर जुइ । उकी मेम्ह डेपुटी गभर्नर शिवाकोटीया नं हस्ताक्षर दु । श्रेष्ठयात प्राइम बैंकया सीईओ नारायणदास मानन्धरयात राष्ट्र बैंक विरुद्ध अदालतय् मुद्दा ति धकाः सुझाव बिउम्ह धइगु तकं द्वपं बियातःगु दु । चित्त बुझे मजूगु खँय् न्याय फ्वनेगु सकस्यां मानव अधिकार खः, मानन्धर अदालतं मुद्दा त्याकाः हानं सिईओ जुयादीम्ह खः ।
LEAVE YOUR COMMENTS