प्रधानन्यायाधी राणा विरुद्ध महाभियोग, देय्या राजनीतिइ ‘आकाझाकां’ न्हूगु तरंग

येँ – प्रधानन्यायाधीश चोलेन्द्र शम्शेर जबरा विरुद्ध म्हिगः ‘आकाझाकां’ महाभियोग प्रस्ताव दर्ता जूगु दु । ९८ म्ह सांसदतय्सं प्रधानन्यायाधीश जबरा विरुद्ध संसद सचिवालयय् महाभियोग प्रस्ताव दर्ता याःगु खः । महाभियोग प्रस्ताव ज्वनाः पुष्पा भुसाल, जीवनराम श्रेष्ठ, देव गुरुङ, गगन थापा लगायतयात सांसदत संसद सचिवालय वंगु खः ।

सत्तारुढ गठबन्धनपाखें आकाझाकां महाभियोग दर्ता याःगुलिं देशय् न्हूगु कथंया राजनीतिक तरंग ब्वलंगु दु । वइगु फागुन ४ गते न्ह्याइगु सदनय् एमसीसी टेबुल यायेगु तयारी जुयाच्वंगु इलय् महाभियोग प्रस्ताव वःगुलिं थुकियात अर्थपूर्ण रुपं कयाहःगु खः ।

सूत्रं धाःकथं प्रधानमन्त्री शेरबहादुर देउवा, माओवादी अध्यक्ष पुष्पकमल दाहाल व नेकपा (एस) या अध्यक्ष माधव नेपाल दथुइ वंगु शनिवाः बालुवाटारय् च्वंगु बैठकं हे महाभियोग दर्ताया निर्णय याःगु खः ।

सत्तारुढ दलतय्सं न्यायालयया गतिरोध चीकेत महाभियोग हयेमाःगु खः धकाः तर्क याःसां थुकिया खास कारण धाःसा मेगु हे दयेमाःगु अनुमान यानाहःगु दु । महाभियोग दर्ता याये धुंकाः कानुनमन्त्री दिलेन्द्रप्रसाद बडुं न्यायालय दुनेया गतिरोध अन्त्य यायेत प्रधानन्यायाधीशं भूमिका म्हिते मफुगुलिं वय्कः विरुद्ध महाभियोग हयेमाःगु खः धयादीगु दु ।

सूत्रं धाःसा सत्तारुढ स्वंगू दलं राजनीतिक मुद्दा व उकिं थःगु पार्टीयात लाकेफइगु लिच्वःयात ध्यानय् तयाः महाभियोग दर्ता याकूगु अनुमान याःगु दु । आः छुं ई लिपा हे प्रधानन्यायाधीश ज्याय् लिहां वइगु व वयां लिपा वय्कःया गतिविधिं गठबन्धनयात लिच्वः लाके फइगु आशंका शीर्ष नेतातय्सं यानाहःगु खः ।

छुं विज्ञतय्सं धाःसा प्रधानमन्त्री देउवा थ्वहे संसद बैठकं एमसीसी पारित याकेगु लँपुइ वनाच्वंगु दुसा दाहाल व नेपालयात माने याकेत नं वय्कलं महाभियोग हयेगु ज्या यानादीगु विश्लेषण याना हःगु दु । तर संसदय् आकाझाकां महाभियोग प्रवेश जूगुलिं थुकिं एमसीसीया प्रस्ताव जक मखु घोषणा जुइधुंकूगु स्थानीय निकायया चुनाव तकं प्रभावित जुइ फइगु अनुमान नं याना हःगु दु ।

महाभियोग दर्ता जुइवं प्रधानन्याया–धीश राणा स्वतः निलम्बित जूगु दु । वय्कःया थासय् आः कामु प्रन्या जुयाः निगूगु वरियताय् लानाच्वंम्ह दीपकुमार कार्कीं ज्या यानादी ।

महाभियोग पारित याकेगु नितिं प्रतिनिधिसभाया दुई तिहाई बहुमत आवश्यक जुइ । थ्व धाःसा सत्तारुढ दलयाके मदु ।

सम्बन्धित बुखँ

LEAVE YOUR COMMENTS