यलया कृष्ण देगलय् बुंग द्यःया नं मूर्ति

यल (नेपालभाषा टाइम्स)- विश्वया लागिं हे नमूना थें जुयाच्वंगु यल मंगःया कृष्ण देगः नेवाः वास्तु शैलीया छगू अनुपम कृति खः । वंगु स्वन्हु न्ह्यः तिनि कृष्णाष्टमिया लसताय् थ्व देगलय् तःधंगु भीड जुइक मेला जुल । वकुन्हु हे राष्ट्रपति रामचन्द्र पौडेल समेत झायाः कृष्ण द्यःया प्रसाद ग्रहण यानादीगु खः ।

तर यक्वस्यां मसिउगु खँ छु धाःसां थ्व देगःयात कृष्ण देगःधायेगु याःसां थन वास्तवय् कृष्ण जक मखु, महाद्यःया शिवलिंग नं दु । अले देगःया दकलय् च्वय् बुंग द्यःया मूर्ति नं दु । थ्व देगलय् यलया नांजाःम्ह बुंगद्यः (अवलोकितेश्वर) या मूर्ति नं दु धइगु खँ यक्वस्यां मसिउ । कृष्ण देगलय् नीछपु गजू दु । थ्व नीछपु मध्ये दथुइ लाक्क च्वंगु गजू शिखर शैलीया देगःया च्वय् लानाच्वंगु दु । बुंगय् च्वंगु बुंगद्यःया देगः नं शिखर शैलीयागु हे खः ।

च्वमिपिं डा. रेमण्ड ओ.ए. बेकर व स्वयम्भूधर तुलाधरं ‘द नेवारल्याण्ड’ पत्रिकाय् नकतिनि च्वयादीगु च्वसुइ कृष्ण देगःया बुंग द्यः बारे उल्लेख यानातःगु दु । च्वसुइ न्ह्यथनातः कथं कृष्ण देगःया दकलय् च्वय् बुंग द्यःया मूर्ति दुसा थ्व मूर्ति देगःया दुनें धाःसा स्वये मछिं । पिनें स्वःसा जक खने दइ । २०७२ सालय् ब्वःगु भुखाचं थ्व देगःयात नं क्षति यात ला कि धकाः परीक्षण याःबलय् परीक्षण यानादीम्ह निरन कुमार राजवंशीं बुंग द्यःया मूर्ति खनागु धकाः जानकारी बियादीगु खः ।

कृष्ण देगः वैष्णव जुजु सिद्धिनरसिंह मल्लं दयेकादीगु खः । तर सिद्धिनरसिंह मल्लं थः वैष्णव धर्म माने याइम्ह जूसां स्थानीय जनताया भावनायात कदर यासें देगलय् बुंग द्यःया मूर्ति नं तयादीगु खँ धायेगु याः ।