न्यायाधीशया निं‌ति‌ं‌ जर्बजस्ती पःखाः थु‌ंगु विरुद्ध सतकय् कुहां वयेगु ख्याच्वः

येँ – यलया धोबिघाटय् मुद्दा लानाच्वंगु छखा छेँया पःखाः थुंगु खँयात कयाः म्हिगः सडक विस्तार पीडित संघर्ष समितिया कार्यकर्ता व स्थानीय मनूतय् दथुइ ल्वापु जूगु दु । स्थानीय सुमन महर्जनया छेँनं लँपु वनाच्वंगु दु धासें अन च्वंपिं छुं मनूतय्सं म्हिगः सुथय् ७.३० बजे डोजर सःताः वय्कःया छेँया पःखाः थुनेगु ज्या याःगु जुयाच्वन । थुकिया जानकारी वयेवं शेभ नेपाः भ्यालीया कार्यकर्ता सुरज महर्जन अन थ्यंकः वन । वय्कलं अन भिडियो खिचे यायेवं स्थानीय मनूतय्सं वय्कःयात ल्हाः वानाः दाया बिल । वयां लिपा संघर्ष समितिया मेपिं नं आपालं कार्यकर्तात अन थ्यनेवं स्थानीय मनूत बिसिउँ वन । हातपातया झ्वलय् सुरजया मोबाइल नं लुटे यानाः यंकूगु दु ।

थुकिया विरुद्ध संघर्ष समितिं सानेपाया प्रहरीइ ज्यान मार्ने अभियोगय् उजुरी तःगु दु । संघर्ष समितिया नायः सुमन साय्मिं ‘नेपालभाषा टाइम्स’ यात कनादी कथं सुमन महर्जनया छेँनं लँ वनाच्वंगु खः लाकि मखु धइगु खँय् मुद्दा हे चले जुयाच्वंगु दनि । यदि मुद्दां लँ हे दु धकाः फैसला यात धाःसा वय्कःया पःखाः थुनाः लँ कायम यायेत थःपिं तयार दु । तर फैसला मवयेकं सुयां छेँय् डोजर चले यायेगु पाय्छि मजूगु कारणं थःपिं सतकय् वयागु खँ वय्कलं कनादिल ।

थ्वहे झ्वलय् म्हीग येँया कालोपुलय् सर्वोच्च अदालतया न्यायाधीश वरुणबहादुर कार्कीया छेँय् गाडी यंके माल धकाः वय्कःया छेँय् दुहां वनेगु गल्लिइ च्वंपिं फुक्क हे मनूतय्गु छेँया पःखाः थुना छ्वःगु खँ नं साय्मिं कनादिल ।

४ फिट जक लँ दुगु थासय् दंक जग्गा न्यानाः छेँ दनेधुंकाः आः कर्पिनि जग्गा मिचे यानाः थःगु लागिं लँ पिकायेत स्वःगु द्वपं नं वय्कलं बियादिल । जबर्जस्ती पःखाः थुनाः लँ पिकायेत स्वत धाःसा उकिया विरुद्ध नं थःपिं सतकय् कुहां वयेगु ख्याच्वः वय्कलं बियादिल । अन प्रहरी व नगर प्रहरीया जवानत समेत हयाः पःखाः थुनेगु ज्या याःगु खः ।