ने. सं. ११४४ कौलाथ्व पारू - नःलास्वनेगु

चीनं वइगु रेलया स्टेशन तोखाय्

येँ – चीन व नेपाः स्वाइगु रेलमार्गया नेपाःपाखेया स्टेशन तोखाय् तइगु जूगु दु । नेपाः–चीन सीमापारी रेल आयोजनाया पूर्व सम्भाव्यता अध्ययन प्रतिवेदनय् रेल स्टेशन तोखाय् तयेगु खँ न्ह्यथनातःगु दु । उगु रेलमार्ग रसुवागढीनिसें तोखा तकया लम्बाई थ्यंमथ्यं ७२ किमि जुइगु खँ धाःगु दु ।

पूर्व सम्भाव्यता अध्ययन प्रतिवेदन कथं थुगु रेलमार्गया अप्वः धइथें भाग सुरुङ व छुं तजाःगु ताँ जुयाः तोखाय् अन्तिम स्टेशन जुइ । निगुलिं पक्षं बिउगु सुझाव कःघानाः छुं न्हिया दुने चिनियाँ डिजाइन परामर्शदाता फष्ट सर्भे एन्ड डिजाइन इन्ष्टिच्युट (एफएसडीआई) पाखें अन्तिम प्रतिवेदन लःल्हाइगु खँ धाःगु दु ।

चिनियाँ व नेपाः सरकारया दथुइ जूगु सहमतिइ परियोजनाया विस्तृत सम्भाव्यता अध्ययन जुइगु खँ धाःगु दु । चीनया स्वशासित क्षेत्र तिब्बतया सिगात्सें शुरु जुयाः केरुङ जुसें नेपाः व चीनया सीमाना रसुवागढीं येँय् तक विस्तार जुइगु उगु रेल परियोजनया पूर्वसम्भाव्यता अध्ययन प्रतिवेदनय् दुथ्याःगु थीथी विषयया गहन सहलह यानाः सुझाव बिउगु खः ।

वंगु भदौ ३ निसें ५ गते तक चीनया सियान सहरय् नेपाःया अधिकारी व चिनियाँ अधिकारीया दथुइ सहलह जूगु खः । उगु सहलह ज्याझ्वलय् नेपाःपाखें भौतिक पूर्वाधार तथा यातायात मन्त्रालयया सचिव मधुसुदन अधिकारीया मन्त्रालयया सहसचिव, रेल विभागया महानिर्देशक, कानुन, न्याय व संसदीय मामिला मन्त्रालय, परराष्ट्र मन्त्रालय व अर्थ मन्त्रालयया प्रतिनिधिपिं दुथ्याःगु खःसा चिनियाँ पक्षपाखें राष्ट्रिय रेल प्रशासनया उपप्रशासक जेहेन्ज जियानाया नेतृत्वय् परराष्ट्र मन्त्रालय, यातायात मन्त्रालय, नेशनल रिफर्म एन्ड डेभलपमेन्ट कमिसन व तिब्बत स्वशासित क्षेत्रया प्रतिनिधिपिं दुथ्याःगु खः ।