याकुजाया कारणं जापान उडान स्थगित

येँ – नेपाल वायु सेवा निगमं जापान उडानया निंतिं नेपाल नागरिक उड्डयन प्राधिकरण (क्यान) याके अनुमति प्रमाणपत्र (एओसी) कायेधुंकाः नं उडान धाःसा याये फयाच्वंगु मदु । उडानया निंतिं जापानं सहमति मबिउगु खँ धाःगु दु । जापानया निंतिं नेपाल वायुसेवा निगमं जीएसए (जनरल सर्भिस एजेन्ट) नियुक्त याःगु विवास्पद जूगुलिं उडान अनिश्चित जूगु खः ।

निगमं गैरआवासीय नेपाली संघया पुलांम्ह अध्यक्ष देवमान हिराचनया कम्पनीयात जीएसए बीत्यंगु खःसा जापानं उकी असहमति क्यनाच्वंगु दु । हिराचनया विजनेश पार्टनर व जापानया अण्डर वल्र्ड ‘याकुजा’ दथुइ स्वापू खनेदुगुलिं जापानं हिराचनया कम्पनीयात जीएसए बीत अस्वीकार याना वयाच्वंगु खः ।

क्यानं जापान उडानया निंतिं माघ १८ गते अनुमति कायेधुंकूगु दु । निगमं अन्तर्राष्ट्रिय उडान विस्तारया निंतिं गुहकार्य यायेगु लिसें कन्ट्री म्यानेजर कथं सन्तोष पाण्डेयात नियुक्त यानाः जापान छ्वयेधुंकूगु दु । नेपाल एयरलाइन्सं थ्वहे फागुन १५ गते निसें उडान यायेगु तयारी यानाच्वंगु खः । तर जापान नागरिक उड्डयन प्राधिकरणं आः तक स्वीकृति मबिउगुलिं उडान याये फयाच्वंगु मदु ।

थुखे नेवानियात उडान अनुमतिया निंतिं नागरिक उड्डयन प्राधिकरणं जापानय् फुक्कं भ्वं छ्वयेधुंकूगु खँ धाःगु दु । प्राधिकरणया कथं थ्वहे फेब्रुअरी दुने जापानय् उडान अनुमति वइगु सम्भावना दु । निगमं लःल्हाःगु भ्वं जापानया नागरिक उड्डयन प्राधिकरणं अध्ययन यानाच्वंगु खँ धाःगु दु । निगमया न्हूगु ‘ए ३३०’ वाइड बडी जहाजं येँ–ओसाका उडान यायेत तयारी यानाच्वंगु दु ।

अथेहे निगमं वइगु चैत १५ गते तक चीनय् नं उडान यायेत्यंगु दु । येँ–ग्वान्जाओ तप्यंक उडान यायेत चीनय् नं कर्मचारी व्यवस्थापन ज्या क्वचायेधुंकूगु दु । चीनया निंतिं कन्ट्री म्यानेजरया रुप शैलेस कंसाकारयात नियुक्त यानाः छ्वयेधुंकूगु दु ।