प्रदेश नं. २ : राजधानी व प्रदेशया नां क्वःछीत मतदान जुइगु

येँ -प्रदेश नं. २ या नां व राजधानी क्वःछीत निक्वःखुसी मतदान जुइगु जूगु दु । आः वइगु माघ ३ गते मतदान जुइगु खँ प्रदेशसभा सचिवालयं धाःगु दु । प्रदेशया नां व राजधानीयात कयाः सहमति मालेगु निंतिं सभामुख सरोज यादवया संयोजकत्वय् फुक्कं राजनीतिक दलया सांसदत दुथ्याःगु संसदीय समिति नीस्वंगु खः । तर समितिइ तःक्वःमछि सहलह याःसां नं सहमति मजुइवं मतदान यायेमाःगु खः ।

संसद सचिवालयया सचिव रंजित यादवं नां व राजधानी क्वःछीगु निंतिं माघ ३ गते निर्वाचन जुइगु जानकारी बियादीगु खः । प्रदेशया नां ‘मधेश’ तयेत सत्तारुढ जनता समाजवादी पार्टी, माओवादी केन्द्र व विपक्षी लोकतान्त्रिक समाजवादी पार्टी छप्पँ जुयाच्वंगु दु ।

नेकपा एकीकृत समाजवादी व एमाले प्रदेशया नां ‘जानकी’ तयेमाःगु खँय् छप्पँ जुयाच्वंगु दुसा नेपाली कांग्रेसं ‘मिथिला भोजपुरा’ तयेमाःगु अडान कयाच्वंगु दु । उकथं हे प्रदेशया राजधानीया नितिं जनकपुरधाम व वीरगञ्जया नां दर्ता जुयाच्वंगु दु ।

थ्व स्वयां न्ह्यः २०७६ साल चैतय् मतदान जूगु खःसा बहुमत धाःसा खाके मफुगु खः । प्रदेशया नां व राजधानी क्वःछीत मुक्कं १०४ म्ह सांसदया निगू तिहाइ बहुमत माः ।

सम्बन्धित बुखँ

LEAVE YOUR COMMENTS