मत सीसा फोन यानादिसँ !

येँ (नेपालभाषा टाइम्स) – स्वनिगःया थीथी लागाय् छुं ईया निंतिं मत सीवं देशय् हाकनं लोडसेडिङ शुरु जुल लाकि धकाः स्थानीय जनता त्रसित जूगु दु। वंगु आइतवाः सतक विस्तारया झ्वलय् थीथी लागाय् मतया आपूर्ति बन्द जुइगु सुचं लगंख्यःया वितरण केन्द्रं बिउगु खः । तर निरन्तर रुपं मत वनेवं स्थानीय वासिन्दां सामाजिक सञ्जालपाखें कुलमान वनेवं लोडसेडिङ याये त्यनागु खःला धकाः न्ह्यसः न्यनेवं मन्त्रालयं उकियात कयाः प्रष्टीकरण बिउगु खः ।

अज्याःगु ग्याःचिकुया लिसः बिसें मन्त्रालयं पूर्व जानकारी बिना गनं नं मत सित धाःसा मन्त्रालय वा प्राधिकरणय् फोन यानाः जानकारी बिउ धकाः नम्बर समेत सार्वजनिक याःगु दु । आः मत वन धाःसा ऊर्जा मन्त्रीया सचिवालयया हटलाइन ११५१ स २४ सै घन्टा फोन याये फइसा ९८५११० ९८३५ स नं सम्पर्क याये फइगु खँ सचिवालयं धाःगु दु ।